La progresiva desapaición del Padremoñu asturianu, consecuencia del desdexar dafechu’l curiau de los resclavos del nuesu pasáu, ye parte de la política d’escaezu de la propia identidá na qu’Asturies lleva décades somorguiada. Agora toca-y al Turruxón de Peñerudes, a piques de perder la so cabera muria en pie, pero anantes qu’elli otres 28 costruciones civiles, relixoses ya industriales entraron a formar parte d’esta riestra de llaceries
El Turruxón de Peñerudes, en Morcín, vien de ser incluyíu na “Llista encarná” del padremoñu en pelligru de desaniciu qu’espubliza Hispania Nostra
Esta Llista recueye aquellos elementos del Padremoñu Cultural que s’alcuentren sometios a riesgu de desaniciu, baltu o alteración esencial de los sos valores, al oxetu de dalos a conocer y llograr la so igua. La so actualización depende de la collaboración ciudadana, que puede informar de la esistencia de padremoñu en pelligru al traviés del formulariu incluyíu na páxina ueb de l’Asociación, que pondrá entós en marcha’l procedimientu de comprebación col sofitu d’un comité científicu que valorará si el monumentu en cuestión cumple los requisitos pa ser incluyíu.
Ta nidio que ta pendiente una fuerte llabor d’información por parte de los asturianos pa poner al díe esti llistáu, ya que son munches más les costruciones que precisen d’una intervención urxente que torgue’l so desaniciu. De fechu, seique l’asociación foi creada comu filial d’Europa Nostra nel añu 1976, nun foi dica’l 2007 cuando s’iscribió la Torre del Castiellu de Yabio, primer incorporación asturiana a la llista. De magar entós son ya 29 los monumentos asturianos incluyíos, siendo el Turruxón de Peñerudes ya’l pobláu mineru de Bustiello les entraes más recientes.
Nel casu del Turruxón, la declaración de Bien d’Interés Cultural foi valera y anguañu queda namás una parede en pie. El so orixen remóntase al sieglu XII, seique delles fontes baraxen un posible orixe mui anterior, con reforma posterior a cargu del Rei Ordoño I.
Llucía F. Marqués
This work is licensed under a Creative Commons Attribution 4.0 International License.
