Proponen Asturies comu base pal Exércitu de Tierra Español, pesi a la llarga hestoria d’ataques d’esi exércitu al pueblu asturianu y a les reiteraes declaraciones antimilitaristes de la ciudadanía

Anantes mesmo de que se faigan públiques les condiciones, el Gobiernu del “Principado” ya amosó el so interés en crear n’Asturies una base permanente loxística del Exércitu de Tierra Español. Entá nun hai detalles, nin plazos nin presupuestos. Nun se sabe si será rentable o un cargu pa la comunidá qu’acueya esta base militar, pero pue asegurase la fuerte militarización y españolización del territoriu nel que finalmente decida afitase, cuestiones que nun son percibíes pol gobiernu socialista comu pelligros, sinón comu encontos a la so política centraliega.

Rita Camblor, conseyera de Presidencia,  reconoció na Xunta Xeneral que’l Gobiernu del “Principado” ya llamó direutamente al ministeriu pa interesase pola aniciativa. La idega ye apoyada tamién por Ciudadanos, quienes consideren que n’Asturies sobra sitiu, equipamientos y formación, lo que mos convierte al entender de Susana Fernández nuna opción perfecha.

Dende la so óptica española servilista y la so política de creación d’emplegos de baxa calidá, los dos partíos españoles, PSOE y C’s, consideren positivo la militarización española del territoriu asturianu. El restu de grupos parllamentarios entá nun se prenunciaron al respeutu.

Llucía F. Marqués