La Escolina ye un proyectu de Reciella families pol asturianu que surdió hai unos cincu años pa normalizar l’usu familiar del asturianu nun contestu “escolar”, con clases n’horariu de tarde y grupinos pequeños de neños y neñes. El so llabor enllena un ermu educativu qu’esmolez a munches families asturianes: el de la enseñanza  na llingua llariega.

Na escolina neños y neñes de 2 a 9 años aconceyen una vegada a la selmana pa deprender n’asturianu a traviés del deprendizaxe manipulativu y por descubrimientu, nun entornu de socialización cola reciella de la so edá, siempre col acompangamientu de profesoráu especializao y en grupinos pequeños.

La cris sanitaria interrumpió el final del cursu pasáu y esti añu -por agora- nun van entamar a furrular nes mesmes feches d’entamu escolar, ya que tan a la espera del desendolcu del andanciu, les istruciones más clares tocante a actividaes estraescolares y el propiu andar del cursu llectivu nes escueles asturianes.

Ello ye qu’informen a les families de qu’hasta’l mes d’ochobre nun van tomar un determin sobre esti tema, si bien caúna de les escolines (Xixón, El Remediu, Carreño…) actuará en función de les diferentes situaciones (espacios, contestos, grupos) nes que s’alcuentren.

Les families interesaes en recibir información sobro les decisiones que se vaigan tomando pueden mandar un mail a info@reciella.com.