El Pozu Funeres, en Llaviana, foi escenariu d’un de los munchos asesinatos múltiples de la época franquista, especialmente respigante pola so crueldá. Un númberu indetermináu de fugaos, xunto coles sos families, foron aventaos vivos al pozu, onde remanecen los sos calabres a la espera d’una esumación con garanties que permita’l reconocimientu de toos ellos; namás se conocen los datos de 8 d’ente ellos, militantes comunistes y socialistes de los conceyos de Llaviana, Bimenes y Samartín del Rei Aureliu  que’l 13 d’Abril de 1.948 continuaben la guerra nos montes.

El domingu viniente, comu tolos años, dos marches subirán por Peñamayor dica’l Pozu mesmu, en remembranza y homenaxe de los guerrilleros antifranquistes allí asesinaos y de les sos families. L’actu ta entamáu polos Cientros Sociales Sestaferia CS, (Xixón),  CSA La Xusticia, (Llangréu), CSA La Semiente, (Samartín), Espaciu La Llegra, (Uviéu), Llar El Mataderu, (Siero) ya’l Centru Social L’Apiaderu, (Nava).

La primer marcha sal dende Bimenes, un de los conceyos afeutaos pola masacre; ellí la cita sedrá delantre la Casa Conceyu, en Matimporra, onde se xuntarán los coches pa dir fasta Fayacaba, dende onde saldrán caleyando direición Campa Gües y Pozu Funeres.

Otra marcha saldrá a les 12:00 dende la Cuenca’l Nalón, con cita en La Baúa pa salir andando direción Campa Gües y Pozu Funeres. La xuntanza d’ambes marches ta prevista pa les 12:30 y la llegada al Pozu Funeres a les 13:00. Allí tendrá llugar l’actu d’homenaxe a la llucha antifascista nel qu’intervendrán dellos miembros de los 6 cientros sociales autoxestionaos convocantes.  Darréu, tendrá llugar una xinta comunitaria.