Mañana va ser el 8 Setiembre más antimonárquicu

  • 7 Setiembre, 2020

El manifestamientu de mañana, a les 12:30 nel Humedal (Xixón), preslla un mes d’intensa actividá antimonárquica, na que se cellebraron tres concentraciones, un cambiu de nome de cai, una quema de semeyes de los reis d’España y una desinfeición de los llugares pelos qu’estos pasaron, el coleutivu d’organizaciones ensiertaes nel movimientu “Asturies nun tien Rei” dedica’l Díi d’Asturies a desixir, baxo’l mesmu llema, el fin de la monarquía y del actual sistema económicu y social

Seique les organizaciones participantes, AndechaAstur, Anticapitalistes Asturies, Bloque Críticu, Centros Sociales d’Asturies, Comité pola Amnistía, CSI, Darréu, FAMYR, JCE m-l, Lluchando pola Soberanía y UJCE, comparten al cien por cien la necesidá de baltar l’actual sistema monárquicu, hai matices pente ellos, sobre tou no que cinca al gráu d’emportancia de les estremaes cuestiones ensiertaes nel tema.

Asina, mientres que los Anticapitalistes prioricen el desaniciu del sistema económicu que carecemos perriba de les cuestiones memorialístiques y pa los sindicatos el protagonismu ta n’actualidá de los conflictos llaborales y de clas, pa la Federación Asturiana Memoria y República la reparación de los crímenes del franquismu y la monarquía son imprescindibles pa avanzar na hestoria “La impunidad de la Monarquia costruyese sobre la impunidá del Franquismu. De los polvos de nun investigar los crímenes franquistes vien que nun se investiguen les tropelíes de la Casa Real. Ca vegada ye más claro que nun hai Democracia ensin Republica,y que nun habrá xusticia ensin aplicar los principios de verdá, xusticia y reparacion, con garantíes de non repetición, a los crímenes de la Dictadura”. Dende’l Comité pola Aministía xunen los dos conceutos, y xustifica la necesidá de finar col reináu borbónicu declarando que “La Monarquía en España representa la continuación del franquismu y los intereses de la oligarquía y los grandes empresarios. Ye una institución anacrónica y antidemocrática cola que tenemos que acabar”. 

Lo mesmo pasa col marcu territorial, ya que mientres pa dellos coleutivos, como Darréu, Andecha Astur o Lluchando pola Soberanía nun hai dubia de qu’esti tien de ser Asturies, otros, comu el Comité pola Amnistía, falen de que “l’alternativa a la monarquía tien de ser una República española que reconoza la esistencia de los estremaos Pueblos y el drechu al autodetermín”.

Una de les organizaciones pa les que más emportancia tien el marcu territorial ye Andecha Astur, que defenden la creación d’una República Asturiana comu proyeutu de futuru p’Asturies, recuperando el marcu creáu pol Conseyu Soberanu “El camín pa finar col Reinu d’España pasa por declarar la República Asturiana. Dende los pueblos del Estáu tendrán que ñacer les repúbliques que presllen la transición, finando col Reinu d’España y presllando un ciclu hestóricu.”

Otru puntu perimportante nel que tolos grupos participantes tan d’alcuerdu ye n’onde tien de residir la Soberanía y la capacidá de decisión sobre’l futuru, y ehí nun hai alderique posible: la Soberanía reside nel pueblu; el restu, son xugos.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies