El cursu 2020/2021 arrancó oficialmente n’Asturies va 4 díes, pero los y les intérpretes de llingua de señes siguen esperando, en paru, ensin saber cuándo, onde nin comu van reincorporase, nin en qué condiciones
La privatización del serviciu d’interpretación de llingües de señes nos colexos ya istitutos asturianos ye fonte de conflictos tolos años, complicando la prestación d’esti serviciu imprescindible pa los escolinos con problemes d’audición. Esti añu, col cursu entamáu, los intérpretes y les families siguen ensin saber cómu se cubrirán les necesidaes de los sos usuarios nin que midies van tomase’n rellación a la seguridá sanitario.
A entamos d’Agostu, albidrando ya que daqué asina podía pasar, l’Asociación d’Intérpretes de Llingua de Señes en Llucha dexaren nidio les sos revindicaciones, entamando pola incorporación al cursu al mesmu tiempu que’l restu la plantiya docente, ello ye, el pasáu ún de Setiembre, puntu que ta nidio que nun se cumplió. La mesma situación dióse’l cursu pasáu, cuando’l cambeu d’empresa contratada pa ufrir el serviciu y los trámites burocráticos de llicitación y posterior contratación retrasaron la cuestión a bien entráu l’añu escolar.
La incorporación tardía al cursu implica una dificultá estra a la hora d’apautar de manera efeutiva col personal docente y l’equipu de NEAE. Pa los escolinos ye imprescindible la presencia d’un intérprete de llingua de señes dende’l primer díi de cursu y demientres toles hores lletives, precisamente otra de les revindicaciones del coleutivu.
No que cinca a proteición ante l’andanciu, pa los intérpretes ye primordial cuntar con fociqueres tresparentes homologaes que garanticen la comunicación efeutivo colos escolinos. Aparte d’eso, reclamen les mesmes midíes de seguridá que’l restu la plantiya.
Esta situación de desamparu, desinformación y falta d’estabilidá repítese un añu tres d’otru, polo que los trabayadores piden que’l serviciu seya públicu pa evitar que se repitan estes situaciones.
Llucía F.Marqués
This work is licensed under a Creative Commons Attribution 4.0 International License.
