Xixón acueye dos fines de selmana de la COMETCON’20

  • 25 Agostu, 2020

La convención ufrirá posibilidaes d’arruelu demientres 6 díes, de 10 a 21 hores, en cinco puntos de Xixón

 CometCon 2020, la gran Convención de Cultura y Espardimientu Alternativu d’Asturies, reinventóse pa poder ufrir los mesmos conteníos, pero cola máxima seguranza nestos tiempos nuevos. Asina lo presentaron ayeri na Casa Conceyu de la ciudá Ana González, alcaldesa de Xixón, Iván Aitor Lucas del Amo, direutor xeneral d’Anovación, Investigación y Tresformación Dixital del Principáu d’Asturies, y Héctor Lasheras, direutor del certame.

El certame tresformóse nunes xornaes culturales, esposiciones, concursos y ponencies que van celebrase los díes 28-29-30 d’agostu y 4-5-6 de setiembre y programará un total de 66 actividaes. Nesta edición octava, les llocalidaes van ser de baldre, pero ye preciso reservales enantes na web http://cometcon.es/2020/, pues hai aforos llendaos pola mor de la sitación sanitaria. Les entraes van repartise por orde rigurosu d’iscripción.

Youtubersinfluencers, concursu de Cosplay, ponencies de la comunidá maker, charres sobro’l sector de los videoxuegos, esposiciones de Star Wars, Lego, meses redondes y munches más actividaes van allugase na Antigua Escuela de Comerciu, el Centru de Cultura Antiguu Institutu, el Muséu Nicanor Piñole, la sede’l Conceyu de la Mocedá de Xixón y el Centru Comercial Los Fresnos.

Cadía, n’horariu de 10 a 21 hores, va haber actividaes pa tolos públicos, dende los más pequeños hasta los señardosos de los videoxuegos retro, pasando pelos aficionaos a les tendencies últimes d’espardimientu alternativu.

La CometCon va abellugar tamién, la tarde del 29 d’agostu a les siete, la gala de los premios nacionales de doblaxe ReTake de l’asociación OCEN, en formatu adaptáu a les circunstancies que tamos viviendo. Afayaráse, ente otros, Carlos Ysbert, actor que pon voz n’España a Homer Simpson y ñetu del pernomáu Pepe Ysbert.

Midíes de seguranza

La convención va afitar midíes de seguranza reforzaes pa garantizar el bienestar de tolos asistentes. Poro, a les entraes anticipaes van xunise l’apertura de puertes con antelación, espacios esquiñonaos, distancia de seguranza de metru y mediu, percorríos marcaos, llimpieza continua y emplegu obligatoriu de mázcara en tolos recintos, amás de personal equipáu que xixilará’l cumplimientu de tolos protocolos. Les actividaes van realizase n’equipamientos con planes d’autoproteición supervisaos y aprobaos poles autoridaes.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies