• Portada
  • >
  • Llingua
  • >
  • L’asturianu tendría de puntuar nes convocatories del Gobiernu d’Asturies

L’asturianu tendría de puntuar nes convocatories del Gobiernu d’Asturies

  • 25 Agostu, 2020

La selmana pasada hubo una ufierta pública sobre señalización d’espacios turísticos que nun facía denguna referencia al asturianu o al usu de la toponimia tradicional de los llugares, pesi a que la Llei 1/98, de 23 de marzu, d’Usu y Promoción del Asturianu afita específicamente que “Les bases de les sovenciones deben d’incluyir la puntuación del usu billingüe na rotulación y la obligación del usu de los topónimos tradicionales

Iniciativa pol Asturianu pide que l’asturianu tenga pesu na puntuación y na baremación de les convocatories y concursos del Gobiernud’Asturies. La organización espresó al traviés del so presidente, Iván Llera, la reclamación de que l’idioma tien de tener un pesu específicu nes estremaes campañes qu’entame’l Gobiernu al traviés de los concursos públicos.

Llera esclarió que “a lo llargo de la selmana pasada hubo una ufierta pública sobre señalización d’espacios turísticos que nun facía dala referencia al asturianu o al usu de la toponimia tradicional de los llugares. “Resulta mui llamativo qu’esta ufierta, na que nun ta presente esa importancia del asturianu na baremación de la puntuación, venga precisamente de la Conseyería de Cultura, Política Llingüística y Turismu. Nun puede ser que pal área de Gobiernu que tien les competencies de política llingüística l’idioma nun tenga un papel importante” declaró Llera.

El presidente de la organización insistió’n que “les bases de les sovenciones deben d’incluyir la puntuación del usu billingüe na rotulación y la obligación del usu de los topónimos tradicionales tal y como establez la Llei 1/98, de 23 de marzu, d’Usu y Promoción del Asturianu. Y nun solamente les propies de la Conseyería de Cultura, tien de ser tresversal en tola acción de Gobiernu. Otres campañes como los Planes Estratéxicos del Comerciu que dependen de la Conseyeríad’Industria, Emplegu y Promoción Económica tamién tienen de favorecer esi usu normal del asturianu”.

Nesi sen, Iván Llera apuntó que “esti tipu de concursos públicos tamién tienen de tener presente l’usu normal del asturianu sobremanera en campañes que tienen muncha visualización. Amás,l’usu del asturianu en campañes como esta nun implica un mayor gastu, col mesmu coste llogramos visibilizar l’idioma, da-y normalidá al usu de la llingua asturiana y cumplir la propia Lleid’Usu”.

P’acabar, Llera reclamó qu’el Gobiernu d’Asturies tien de facer un esfuerciu y siguir dando pasos en toles Conseyeríes pa facer normal l’usu del idioma en toles campañes entamaes dende l’Alministración.

Redaición InfoAsturies

 


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies