Un añu más la organización nacionaliega remembra a los valientes que cayeron defendiendo’l frente asturianu ente los exércitos facistes y reclama’l Conseyu Soberanu comu la cabera istitución democraticamente reconocía pol pueblu asturianu frente al “Principado” y l’Estatutu autonómicu que mos impunxeron dende Madrid ensin permitir a los asturianos votalu.

Comu novedá, na yá tradicional  xubía a les trincheres  de roca que foren testigu de la llucha l’exércitu del Conseyu Soberanu, llantóse una asturina nel picu mesmu’l Filispardi, un intre emocionante de reconocimientu del compromisu d’aquellos que lo dieron tou pola soberanía d’Asturies.

Nun escaezamos que falamos d’un exércitu d’homes y muyeres del pueblu, venios dende toa Asturies a pie y, qu’ensin siquier preparación pa ello, crearon una vraera “Maginot Cantábrica” dende la que defendieron Asturies frente al exércitu facista español.

Tamién na cume, los participantes formaron con lletres les pallabres “República Asturiana”, el mesmu mensaxe que va unes selmanes escribieron enriba la ponte de Cangues.

A la una la tarde, nel monolitu que rinde homenaxe a estos valientes nel Puertu Tarna, tuvo llugar l’actu políticu, nel que se fixo la tradicional ofrenda floral cola intervención de Mariu Arbesú, que defendió la necesidá de caltener la Memoria Hestórica del pueblu asturianu. Nun perdió la ocasión de destacar el “trunfu” pa la llinia política d’Andecha Astur  que supón la utilización interesada por parte d’Adrián Barbón de la figura de Belarmino Tomás, personaxe que’l PSOE ya IU siempres quinxeron caltener tapecíu y qu’agora intenten remanar pal so provechu, reconociendo-y, seique seya pa utilizalu, la so importancia, como fexo Adrián Barbón usando’l despachu de Belarmino Tomás pa entamar la so actividá como presidente del ‘Principado’.

Según pallabres de Mario Arbesú, “Tamos n’un de los meyores momentos de la organización dende va munchu tiempu, y por eso mesmo tenemos más responsabilidá a la hora de vindicar la memoria de los nuesos güelos y bisagüelos, recuperala y saber integrala na dinámica d’anguañu, onde la llucha escontra la monarquía española y la defensa de la República Asturiana marquen agora mesmo l’axenda política asturiana, en bona midía gracies al llabor d’Andecha Astur”.

Dientro’l mesmu marcu d’aición, Andecha Astur vien de proponer a la Xunta Xeneral l’aprebación d’un conxuntu iniciatives pa reconocer y cellebrar istitucionalmente la costitución, na nuechi del 24 d’agostu de 1937, del Conseyu Soberanu d’Asturies y Lleón, asumiendo plena xurisdición y responsabilidá nel gobiernu civil y militar de los sos territorios, y tando presidíu pol hestóricu dirixente Belarmino Tomás.

Redaición InfoAsturies

This work is licensed under a Creative Commons Attribution 4.0 International License.