Esta selmana creóse l’ Asociación del Doblaje de Asturias / Asociación del Doblaxe d’Asturies (ADOAS) col envís de xuntar a profesionales del doblaxe d’Asturies, tanto de la rama artística como de la rama téunica

L’asociación tien ente los sos fines la defensa y ameyoramientu, lo mesmo nel ámbitu artísticu que nel profesional, de l’actividá de los direutores, ayudantes de direición, axustadores y actores y actrices de doblaxe, y de los trabayadores téunicos nesta estaya llaboral.

ADOAS quier la promoción del seutor na sociedá y ante les alministraciones, y de la so rellación colos medios de comunicación y otres instituciones del mediu.

Ún de los espacios nos que se plantega atención especial pa les sos aiciones va ser aquél venceyáu a la relevancia del doblaxe na difusión y normalización de la llingua asturiana.

La selmana entrante l’asociación va escoyer la so xunta direutiva primera per un periodu de trés años.

Redaición InfoAsturies

This work is licensed under a Creative Commons Attribution 4.0 International License.