La iniciativa surde precisamente nesti momentu como respuesta a la incertidume pola que traviesa’l sector del arte escénicu

Trelce son les compañíes qu’anguañu formen la recien creada Plataforma de Profesionales de les Artes Escéniques d’Asturies; “Andi Bilbao Danza”, “Azul & Verde”, “Cía. Vuelta y Media”, “Con Alevosía Teatru”, “L’Alcuentru Teatru”, “Elísabet Martín Teatru”, “Goli Goli Teatru”, “La xata la rifa”, “Mar Rojo Teatru”, “MeraKi Cía”, “Pablo Picallo”, “Producciones Viesqueswood” y “Yheppa Títeres”.

L’arte escénicu, yá bien perxudicáu pola anterior crisis económica, ve agora cómo l’actual pandemia fai apelligrar fasta los
mesmos cimientos de la cultura. L’esmantelamientu del anterior Circuitu de teatru d’Asturies, organismu que, magar precisáu de meyores, yera una iniciativa que vertebraba bona parte de la ufierta profesional, siendo un referente para la comunicación llaboral ente conceyos, alministración y empreses teatrales, aceleró esti cayente, polo que dende la Plataforma aportunen na necesidá d’unidá énte los problemes, y aboguen pola anovación como fonte de soluciones. “Asturies cuenta con recursos”, afirmen “pero ye necesariu sentir a toles partes afeutaes p’algamar un enfoque realista sobro la problemática”.

El so oxetivu ye reforciar la xunión  de tol seutor del arte escénico d’Asturies, dignificando l’oficiu y afitando les bases d’una comunicación y participación necesaries ente tolos profesionales y la Conseyería de Cultura, Política Llingüística y Turismu, amás de cualquier organismu públicu responsable de la cultura en relación a les artes escéniques.
Na plataforma trabayase tamién pa dar voz a los empresarios teatrales, contribuyendo a esclariar la so figura, los sos problemes y la so importancia como pieza fundamental dientro la industria teatral, recalcando la importancia del sector comu actividá económica capaz de xenerar, amás de cultura, riqueza y emplegu.
Otru de los grandes intereses de la plataforma ye la tresparencia; el drechu de cualisquier profesional de les artes escéniques al acesu a la información, representación y participación en cualquier asuntu d’interés pal seutor. Poro, ponen les sos esperances na mesa sectorial del arte escénicu de la que formen  parte y na que se ta aldericando’l futuru del sector por que, gracies al consensu de tolos sos integrantes, se llogren les tan necesaries meyores pal seutor, que vive agora un de los sos momentos más delicaos.

Redaición InfoAsturies

This work is licensed under a Creative Commons Attribution 4.0 International License.