La tercer edición del ciclu XixónTours de visites temátiques n’asturianu torna a la ciudá con “Xixón mete mieu”, un percorríu pela hestoria más turbia y sanguina de la ciudá
Tres l’ésitu de les ediciones anteriores, la plataforma de turismu, ociu y hestoria VerAsturies.com y Cuatro Gotes Producciones, cola collaboración de Xixonaldia.com, retomen les visites guiaes del ciclu XixónTours, visites guiaes temátiques n’asturianu que van ufrise al públicu a lo llargo de los meses vinientes.
XixónTours ye una iniciativa pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu. Tán diseñaes pa buscar un averamientu orixinal a la hestoria de la ciudá, tratando de da-y un enfoque estremau que llame l’atención del públicu xeneral y n’especial de los y les xixoneses, que yá conociendo los llugares que van visitar, pa que puedan ver aspectos estremaos o desconocíos pa ellos.
Les primeres visites d’esta tercer edición van ser les de la ruta Xixón mete mieu, diseñada pola hestoriadora y presentadora de TPA, Arantza Margolles, anque dirán añadiéndose otres nes selmanes vinientes. Esta interesante propuesta avera los y les visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes que mos van llevar n’horariu nocherniegu a conocer los sitios más escuros, terroríficos y misteriosos de la hestoria de la ciudá de Xixón.
La primer oportunidá pa conocer esta visión tan poco avezada de Xixón tuvo llugar anueche, pero queden otres 5 oportunidaes que nun se pueden dexar pasar: 16, 19, 23 y 30 d’Agostu, siempres pente les 21:30 y les 23 hores, previa iscrición na páxina web xixontours.verasturies.com. L’actividá ye de baldre pa menores de 12 años, y tien un preciu de 6 euros fasta los 18 y de 10 p’adultos.
Redaición InfoAsturies
This work is licensed under a Creative Commons Attribution 4.0 International License.
