Los trabayaores de la ITV d’Asturies entamaron güei una fuelga indefinida, fasta que la direición ya’l “Principado” cedan nes sos posiciones. El descontentu de la plantiya, motiváu pola falta de garanties pal cobro de toles sos hores de trabayu, agravóse tres del fracasu de les negociaciones, depués de qu’anularen el paru convocáu la selmana pasada confiando nos sos resultaos. Nel conceyu calteníu na mañana d’ayeri cola direutora d’Industria, Rosana Prada, cuntaben con afitar, al menos, un refuerciu de la plantiya y que les hores estres que se yos piden seyan pagaes, pero nun foi asina.

Los horarios d’atención al públicu allargáronse depués del confinamientu, col envís d’atayar la llista d’espera que s’allargaba ya dica Avientu. L’apertura de sábadu y les dos hores más diaries impliquen un trabayu estra ensin remuneración dala, daqué a lo que los emplegaos nun tan dimpuestos. A la negociación acudieron con una propuesta na que cerca la metá de les hores estres se-yos abonarien comu tales ya’l restu con un plus menor, pero nun hebio alcuerdu, ya que la direición plantega nun contratar refuercios y considerar el trabayu de más comu una “compensación pol trabayu non fechu demientres el confinamientu”.

Amás, consideren que los servicios mínimos impuestos son inxustos ya escesivos, al nun tratase d’un serviciu esencial y ser afitaos unillateralmente, polo que plantegarán darréu una demanda ante lo Contencioso Alministrativo pa recurrilos, anque anuncien que sedrán respetaos.

Nuria Prendes

This work is licensed under a Creative Commons Attribution 4.0 International License.