Adrián Barbón promete que la obra entamará en cuestión “de dies”, lo mesmo que se dixo en Marzu del 2019. En casu de cumplir esta vegada la so pallabra, la reparación finaría dos años llargos depués de la riada que-y dio llugar

En Xineru del 2019 la turbonada arrastraba con un bon tramu del Corredor del Ayer (As-112), que fundió dexando inutilizable un de los carriles de la mesma. Nun primer intre informóse de que la reparación del argayu sedría “en breves” y pasóse’l tráficu a traviés del cascu urbanu, col consiguiente conxestionamientu. Posteriormente, ante la demora na reparación, adautóse la vía pa permitir el pasu nos dos senes pel carril restante. Esta vía ye’l principal acesu a la estación de Fontes d’Iviernu, colo que soporta un fuerte tráficu, especialmente nos meses d’iviernu, con una media que supera los 15.000 veículos al día.

Nel mes de Marzu de 2019 el conseyeru d’Infracadarmes, Ordenación del Territoriu y Mediu Ambiente, Fernando Lastra, afirmó que les obras pa la reparación del fundimientu de la calzada a l’altor de Moreda, podríen entamar darréu, al ser tramitada por urxencia. N’Abril del mesmu añu l’alcalde del conceyu, David Moreno, aconceyaba col presidente d’Asturies, quien informaba de que a lo cabero la obra diba tramitase pola vía convencional, y non d’urxencia, pero que pa Xunu entamarien los trabayos. En Setiembre del 2019 autorizábase’l gastu, estimáu en 503.392 € -la metá de lo estimao anicialmente-. En Xunu del 2020 anuncióse l’entamu de les obres pa Xunetu y n’Agostu Adrián Barbón aconceya col nuevu alcalde, Juan Carlos Iglesias, y promete que l’aniciu de les mesmes sedrá “nunos díes” dexándo a los moraores del conceyu prauticamente na mesma situación que’n Marzu de 2019, ello ye, con una promesa nel aire ya ensin feches concretes d’entamu.

Nuria Prendes