El periodista, Eugenio Fuentes, completó la noticia sobre les cintes del comisariu Villarejo calcando les supuestes declaraciones de Corinna incluyíes nun artículu d’humor del periódicu satíricu El Mundo Today.

Ayeri La Nueva España espublizaba un artículu sobro les conversaciones grabaes pente’l comisariu Villarejo y l’amante de Juan Carlos, Corinna zu Sayn-Wittgenstein. Pa completar la noticia, destaquense delles frases teóricamente filtraes de les cintes, copiaes en realidá del artículu cómicu d’El Mundo Today. El periodista responsable del erru, Eugenio Fuentes, ya presentó esculpies públicamente por nun comprebar les fontes, achacando a les prieses el problema.

El Mundo Today ye un diariu humorísticu en llinia creau nel 2009 qu’adouta un estilu periodísticu pa espublizar noticies ficticies dafechu. Ye perconocíu nel ámbetu periodísticu poles sos parodies y nun ye la primer vegada qu’un llector “pica” y cree les sos noticies. Sicasí, que se sepa, esta ye la primer vegá que-y pasa a un profesional, dexando n’evidencia el nivel de la prensa asturiana.

Nuria Prendes

This work is licensed under a Creative Commons Attribution 4.0 International License.