La organización fae un llamáu públicu a les persones organizaciones contraries a la istitución del Principado y la monarquía a aconceyar y tener preparáu un plan de continxencia en casu de visita real
La familia real española alcuéntrase metanes un tour promocional pel territoriu baxo la so corona col que pretenden blanquiar la so imaxe d’abusos, corrución, delitu ya impunidá, percorríu que nun ta teniendo l’esitu qu’esperaben gracies a la reación de refuga de la población en munchos de los puntos del so viaxe.
El so pasu per Asturies nun ta anunciáu, pero tampocu se descarta, #polo qu’en previsión del mesmu Andecha Astur alvierte a la corona española de que nun sedríen bien recibios y pide que la ruta de blanquiamientu de los Borbones nun pase per Asturies “La so presencia sedría una ofensa inecesaria. Los Borbones nun puen ser bien acoyíos porque la corona española ye preséu de dominación, heredera direuta del franquismu, pegollu vergoñosu del réxime’l 78, ñeru de toa triba de corruciones económiques y polítiques, falta de toa clas d’exemplaridá democrática y moral, y mecanismu medieval de tresmisión xenética del poder”.
Pa garantizar esta rempuesta llamen a entamar darréu una campaña d’asoleyamientu de refuga popular a la monarquía, pero sobre tóu, a tar dimpuestos a aconceyar y reacionar nel mesmu intre que los Borbones anunciaren la so intención de pisar suelu asturianu, casu nel que “Asturies tien d’entrar n’estáu d’alerta y organizar una rempuesta pública que refugue decidíamente tala visita”.
El primer pasu d’esta campaña de refuga faenla col so mensaxe nes redes “Si vienen los Borbones, Asturies respuende” y convidando a compartir el hastag #RepúblicaAsturiana.
Nuria Prendes
This work is licensed under a Creative Commons Attribution 4.0 International License.
