SUATEA plantega un plan de choque educativu

  • 17 Xunetu, 2020

Consideren el protocolu d’organización de la actividá docente pal cursu 2020/21 propuestu pola Alministración   imprecisu, contradictoriu en dalgunos aspeutos y que nun respuende a les necesidaes de salú pública nin educación que tien la comunidá educativa

Na mañana d’ayeri, 16 de Xunetu, tuvo por fin llugar la naguada  Mesa Sectorial d’Educación, pero’l borrador propuestu nun convence al Sindicatu d’Ensiñantes Asturianos, qu’ufren un plan de choque educativu n’ocho puntos col que consideren que tendría d’enfrentase el nuevu cursu que, recuerden, ye probable qu’entame col andanciu entá activu.

Partiendo del puntu de que l’actividá llectiva se desendolque de manera presencial -siempres que la situación sanitaria lo permita- y de que la partida correspondiente a Asturies dientro la dotación estraordinaria de los fondos europeos contra l’andanciu vaiga al cien por cien pa la escuela pública, entamen por aplicar una redución real de ratios, con grupos de non más de 15 escolinos, acompangao d’un plan d’infracadarmes y una afayaiza adautación de los currículos y les programaciones de los cursos.

Consideren necesario dotar al profesoráu d’equipos de proteición y apurriyos formación  en prevención de riesgos y conveniente la presencia con calter permanente de personal sanitariu nos cientros, asina comu la creación d’una Comisión de Salú encargada de coordinar y dirixir les medies a aplicar, mui especialmente palos cientros d’Educación Especial.

Nun s’escaecen de les persones d’especial vulnerabilidá (con enfermedaes respiratories, tratamientos de cáncanu, inmunodeprimies, mayores de 60 años, etc) pa los que nun consideren abondo les midies xenériques recomendaes.

L’inusual fin de cursu anterior fae, pal sindicatu, que seya más necesario que nunca la deteción anicial de les necesidaes educatives, físiques y emocionales de cada escolín, dando un sofitu específicu tantu a aquellos que tengan Necesidaes Educatives Especiales comu a aquellos que pola situación familiar s’alcuentren socialmente desfavorecios.

Bona parte del plan del choque dedícase a la posibilidá de tener que cuadrar docencia presencial con telemática, pa lo que’en primer llugar piden la redución de 25 a 23/18 hores llectives pa los docentes asturianos, igualándo la so xornada cola de la mayoría de los profesionales de la educación del estáu. En cualisquier casu la educación telemática nun ye posible ensin que profesoráu y escolinos cuenten con ferramientes y formación pa trabayar a distancia, incluyendo l’acesu a interné a velocidá afayaiza, cuestión que punxo n’evidencia la esperiencia del caberu trimestre del cursu anterior.

En casu d’educación semipresencial tendrá de tenese en cuenta la duple carga llaboral  y formativa de los docentes, adautándose-yos los horarios y non superándose la xornada lleutiva.

Pa tou ello ye imprescindible la financiación suficiente y la dotación de personal pa executalo, de manera que se garantice’l drechu a la salú y s’avance camín de la igualdá d’oportunidaes y la meyora de les condiciones llaborales y formatives del profesoráu.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies