Los diputaos de Vox queden ensin argumentos: Iniciativa pol Asturianu ponyos perfácil salir de la so inorancia y deprender asturiano; la organización apurre al presidente de la Cámara y a los grupos de la Xunta Xeneral una propuesta na que s’ufre un cursu de baldre nes propies instalaciones del Parllamentu

Iniciativa pol Asturianu regala un cursu d’asturianu a los y les diputaes de los diferentes grupos parlamentarios con representación na Xunta Xeneral. La organización, amás, amplia esti convide a tolos trabayadores de la Cámara y de los propios partíos políticos. Al traviés d’esta propuesta, Iniciativa pol Asturianu quier meyorar la so capacidá y sensibilidá llingüística de los representantes de la sociedá asturiana y de los trabayadores del Parllamentu.

La organización va solicitar a Marcelino Marcos Líndez, presidente de la Xunta Xeneral d’Asturies, que ceda un espaciu y dea facilidaes pa la celebración del cursu propuestu. Un cursu que quier da-yos unes nociones básiques d’asturianu a los diputaos y trabayadores que nun conozan bien la lengua, amás d’esplicar la situación sociollingüística y llegal del idioma.

El cursu, que de ponese en marcha, taría abiertu a tolos grupos y trabayadores del Parllamentu asturianu, ye una propuesta que quier sensibilizar a los grupos políticos y adentrar a los diputaos y diputaes na llingua qu’usen cada día munchos de los ciudadanos a los que representen y tamién dellos de los diputaos al espresase na actividá parllamentaria.

Redaición InfoAsturies

This work is licensed under a Creative Commons Attribution 4.0 International License.