Escolinos de primaria a 20 por aula y estudiantes de bachiller de 30 en 30, ratios que ya yeren escesivos por cuestiones de calidá docente abulten agora esperpénticos a profesores y families
L’anuncia fecha pol Gobiernu’l “Principado” de les condiciones previstes pal cursu viniente nun dexen contentos a dengún de los implicaos. Entamando pol fechu de que les informaciones aporten a los interesaos de manera escalonada, incompleta y a traviés de los medios de comunicación, lo que fae medrar la fuerte incertidume ya esistente. El fechu de que pa negociar estes condiciones nun se convocare la mesa sectorial que lleven meses solicitando agrava más el maltar.
Les noticies falen de 400 profesores más, cuando va menos d’un mes la mesma alministración reconocía la necesidá de que foren mil los nuevos contrataos y los sindicatos desixien una cifra de dos mil pa poder cubrir les necesidaes previstes. Hai que tener en cuenta qu’esti cursu aporta con una sobrecarga estra de currículum atrasáu y que les clases de refuerciu y sofitu van ser necesaries; amás, los profesores más vulnerables por cuestiones de salú y edá tendrien que tener dalgún tipu d’adautación al puestu de trabayu. De fechu, comu ficieron notar los sindicatos docentes, 400 son los profesores que se van xubilar esti añu n’Asturies y les informaciones nun dexen claro si los que se van a contratar son pa cubrir eses nueves vacantes o si se ta falando de 400 más.
Tampoco les cifres económiques cuadren bien, fálase d’una inversión de 30 miyones, abondo pa contratar a 857 profesores, una cifra que si bien sigui siendo insuficiente averaríase más a les necesidaes reales de la situación. La compra de mazcarines y xeles nun xustifiquen los 15 miyones ensin destín nidiu, ya que nun se prevén obres d’adautación nos centros.
Per otru lláu, los ratios por aula son prauticamente los qu’hai, pasando de 25 a 20 en primaria -la redución de ratio aplícase namás de primeru a cuartu de primaria- y quedando en fasta 30 en dalgunos grupos de Bachiller, lo qu’implica distancies d’escasamente 50 cm pente estudiantes.
Los sindicatos denuncien tamién la falta de previsión ante un posible rebrote. La Conseyería d’Educación lléndase a dar orden a los cientros de “planificar esa posibilidá”, ensin ufrir dengún protocolu base.
Llucía F. M
This work is licensed under a Creative Commons Attribution 4.0 International License.
