Al tiempu que’l presidente unvía mensaxes d’alarma énte l’únicu contaxu nos postreros 25 díes, la so alministración aplica criterios económicos y ordena el zarru de 290 cames nos hospitales asturianos 

El Sindicatu d’Enfermería, SATSE, informa de que nin siquier la presente crisis sanitaria desterró l’avezada práutica d’aplicar “retayos de branu” tantu a les plantiyes de sanitarios como a les cames disponibles nos hospitales. Nun esiste denguna xustificación mélica pa esti descensu añal del serviciu sanitariu, pero si yá tolos años resultaba incomprensible, anguañu, col riesgu de recaida bien presente, entá más. Amás, les llistes d’espera atópense más enchíes que nunca, por cuenta de la desatención a los enfermos d’otres dolencies por mor de la centralización de recursos nel Covid-19 nos caberos meses.

Pa SATSE lo oportuno sedría “implementar un plan de Choque pel branu p’ameyorar l’asistencia a pacientes Covid-19, prevenir rebrotes y poner al día consultes, pruebes diagnósticas ya intervenciones rellacionaes con otres patoloxíes, amenorgando les llistes d’espera. Pela cueta priorizóse l’aforrar dineru a cuenta de la salú y seguridá de ciudadanos y pacientes”.

Nun se trata solo de les 290 cames inutilizaes mientres el branu, amás el serviciu de salú vuelve paralizar hasta dempués de la temporada braniega una bona proporción de consultes esternes, pruebes diagnóstiques ya intervenciones quirúrxiques “non urxentes”. Esti retayu xúntase n’Asturies col caltenimientu hasta’l 30 de setiembre del zarru de bona parte la rede de consultorios periféricos d’atención primaria.

El sindicatu considera que  nes actuales circustancies, el sistema sanitariu ta  preparáu en casu d’un rebrote de covid-19.

Nuria Prendes