Mientres la mayoría de les nacionalidaes hestóriques -especialmente les que tienen nos sos gobiernos partíos propios- tán bien perriba de la media estatal de riqueza, Asturies sigue nel peor puestu del Norte

La sele xubida del PIB de los caberos años (namás un 5% en venti años) nun algama para sacar a Asturies del peor puestu no que cinca a riqueza. Según les cifres recoyíes pol Institutu Nacional d’Estadística (INE) Asturies ye’l territoriu más probe del Norte l’Estáu. Entantu’l resultáu de dividir el PIB ente’l númberu d’habitantes a nivel español ye de 25.854 euros, el d’estremar el PIB ente la población asturiana queda en 23.087, cuasi un 11% menos, ello ye, namás un 89’3% de la media.
Esta situación resalta metanes un Norte espolleto nel que la mayoría de les naciones hestóriques del estáu superen con muncho la media, como ye’l casu d’Euskadi, onde la riqueza supera nun 31,8% la estadística española o Catalunya, onde son un 19% más ricos que la media.

Esta diferencia de cifres pa con una redolada tan asemeyao nun puede sinón achacase al desvíu de fondos escontra les distintes trames de corrución gubernamental qu’Asturies sigui careciendo y a la política de desaniciu industrial y agrariu que’l PSOE aplicó n’Asturies les caberes décades, nes que se sustituyó un sistema granible por un apueste a xeitu perdíu pol turismu, desarmando pel camín toles opciones que podríen apurrir, non solo riqueza, sinón estabilidá económica.

Amás nesi procesu la población más granible, ello ye, la más nueva y la meyor preparada, viose forzada a abandonar el país, xenerando un procesu d’avieyamientu y xorrecimientu porcentual de población non granible que, en casu de nun correxise, menacia con sumir Asturies nun círculu viciosu descendente.

This work is licensed under a Creative Commons Attribution 4.0 International License.