Andecha Astur denuncia una trama d’intereses empresariales y personales que, con sofitu istitucional, tien comu consecuencia la inasumible perda de puestos de trabayu ya’l desaniciu del texíu económicu asturianu. La organización nacionaliega desixe al Gobiernu Asturianu que garantice darréu un plan de viabilidá pa Vauste  nel que la prioridá seya’l caltenimientu de los 130 puestos de trabayu en pelligru

Nel 2013 namás la resistencia de los trabayaores y la fuerte movilización de tola ciudadanía xixonesa permitió que la multinacional norteamericana Tenneco presllare la so filial en Xixón. Púnxose entós en marcha un procesu acallentáu y consintíu de pieslle y desllocalización de la inversión que busca la ruina empresarial que xustifique esti preslle, procesu denunciáu continuamente polos trabayaores dende l’entamu’l conflictu y que, sigún denuncia Andecha Astur, foi “consintíu pol Gobiernu d’Asturies, amparáu pola FADE y sospechosamente mal contestáu polos sindicatos españoles (CCOO, UGT y USO)”.

Nel 2016 y tres les fuertes movilizaciones, el Gobiernu d’Asturies avaló la so venta al fondo d’inversión Quantum Capital Partners, que se comprometió a dinamizala y caltener los puestos de trabayu. Ya entós se llevantaron voces avisando de que l’hestorial del grupu, ricu’n desmantelamientos d’empreses, dexaba entever otres intenciones.

A lo llargo de los 4 años de xestión Quantum incumplió sistematicamente los compromisos alquirios (inversiones, cartera veceros…), cuestión continuamente denunciada polos sos emplegaos pero obviada pol Gobiernu d’Asturies. Nel añu 2019 l’entós conseyeru Isaac Pola- allabó publicamente la xestión de Quantum, restando valor a les protestes de los trabayaores y ñegando’l riesgu de desllocalización.  Nel mesmu añu, entá ensin un plan de viabilidá qu’asegurare la carga llaboral a la empresa, Vauste  ye revendía al fondu de los Emiratos Árabes DSA, qu’al traviés de la so marca Natural Mining Resources (NMR) repite les mesmes promeses.

Meses más tardi NMR presenta un concursu voluntariu d’acreedores asociáu a un plan de viabilidá nel que sedríen dispidíos pente 40 y 60 trabayaores y que plantega una baxada de sueldos del 20%; de nun ser aceutáu esti concursu implicaría la lliquidación de Vauste.

Lloñe d’intervenir pa protexer los drechos de los trabayaores y el yá perxudicáu texíu industrial xixonés, l’actual Conseyeru d’Industria, Enrique Fernández, unvía un mensaxe de tranquilidá ñegando un preslle tapecíu de la empresa y asegurando qu’esta “tien futuru gracies a les midíes qu’el gobiernu PSOE-Podemos toma en Madrid pal seutor l’automoción”.

Andecha Astur denuncia los turbios antecedentes de NMR, que se define agora comu la man lliquidadora de Vauste y alvierte la so implicación en toles estayes de la trama’l carbón. Con domiciliu’n Madrí, l’únicu alministraor de NMR nun tien más esperiencia que la de ser xixilante nuna mina asturiana de carbón, polo qu’AA albidra que pudiere ser un testaferru. Esta mesma empresa recibió de l’Autoridá Portuaria de Xixón (organismu de titularidá pública) una cesión de 10.000 metros cuadraos nos que criba carbón foriatu, mécelo con escories y reviéndelo, moviendo más carbón del que xeneraron en so díe les mines asturianes y dexando n’evidencia la falcatrua de les intenciones ecolóxiques de la “descarbonización”. Los implicaos nel reciente conflictu llaboral d’EBHI, empresa pública, denunciaben el desvíu de carga de trabayu a esta concesionaria, siendo una de les posibles beneficiaries d’una cris por descapitalización n’EBHI que llevase a esta empresa pública d’estiba a la privatización.

Tou esti crucie de porgüeyos, despidos y empreses sospechoses lleven a Andecha Astur a pidir un mayor control sobre lo que llamen “la trama carbonífera” y a tar sollertes “por si dalgún miembru cimeru de l’Autoridá Portuaria o del Gobiernu d’Asturies acaba, gracies a les puertes xiratories, en dalguna empresa privá rellacioná col casu Vauste”.

Nuria Prendes

This work is licensed under a Creative Commons Attribution 4.0 International License.