• Portada
  • >
  • Llingua
  • >
  • Cellebraes les pruebes d’accesu pal máster d’asturianu

Cellebraes les pruebes d’accesu pal máster d’asturianu

  • 1 Xunetu, 2020

Capaciten tres alumnos nel accesu al máster de Formación del Profesoráu d’Educación Secundaria Obligatoria, Bachilleratu y Formación Profesional

El pasáu martes 23 de Xunu cellebráronse les pruebes d’accesu a estudios de máster na Universidád’Uviéu, dientro’l marcu de la “nueva normalidá”. Diches pruebes incluyeron, ente otres, el conocimientu de llingua estranxera (inglés y portugués) necesaries pal accesu a los estudios de máster, asina como les pruebes d’especialidá pal Máster de Formación del Profesoráu, marcu nel que s’afita la mención d’asturianu.

La prueba, dirixía pol anguaño profesor de la institución y presidente de la Academia de la Llingua, Xosé Antón González Riaño, contó con cuatro matriculaos, a la que se presentaron namái tres. Los resultaos, yá disponibles pal públicu, amosaronl’alta capacitación de los aspirantes dao que tolos alumnos superaron los requerimientos p’acceder a la mención. Les llistes d’accesu a los estudios, caberu puntu de regulación, van espublizase’l prósimu 9 de xunetu.

Recordemos que’l máster de Formación del Profesoráu en mención Asturianu ye de los únicos estudios dedicaos a la llingua y la lliteratura llariega, xuntu col minor de la Facultá de Filoloxía y la mención de Maxisteriu. Antaño les places de la especialidá yeren namái 5; sicasí, l’añu pasáu aumentaron en 3 places. Pa poder entamar los estudios hai dos víes d’accesu: al traviés de los estudios de Filoloxía n’Uviéu col minor, casu nel cual tienen prioridá los candidatos, o bien cola prueba, si bien recomiéndase tener unos estudios rellacionaos.

Les places pal profesoráu d’asturianu suponen cada cursu un problema pal Principado, llegando inclusu a quedar en dellos centros ensin enseñanza el primer trimestre. Otramiente, tamién hai problemes pa que los escolinos puedan cursar l’asinatura, al tar tachada la casiella na fueya matriculación p’acomodar los intereses de la direición. Asina, ye perimportante qu’aumente la demanda y les places pa la formación del profesoráu, pero nun podemos escaecer tampoco les condiciones llaborales: gran parte del profesoráu contratáu ex profeso nun llega a trabayar 20 hores selmanales, polo que los sos ingresos son ridículos.

Esti añu 2020 garra mayor importancia pol contestu de reivindicación del asturianu y la so oficialidá. Dende la entrada del nuevu gobiernu “socialista” capitaneáu por Adrián Barbón, les espectatives en cuantes l’estatus de la llingua llariega xubieron dao que la Federación pasó a sofitala tres d’una votación. Sicasí, nesi aspeutu nun s’observen avances, y la tan clamada oficialidá paez tan llonxana como enantes, magar que se convocaren les pruebes de B2 MCERL. Amás, la Universidá d’Uviéu ha d’enfrentase a les acusaciones d’abandonu énte los alumnos qu’esti confinamientu carecieron d’esixencies y modificaciones risibles de los criterios d’evaluación.

Aymara González Montoto

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies