Estos premios, que ñacieron cola creación del Primer Concursu de Narraciones Curties Diputación d’Asturies ya’l Premiu de Novela Xosefa Xovellanos, foron ampliándose añu a añu fasta incluyir cincu estayes lliteraries, a les que se sumen el Premiu Nel Amaro de teatru ya’l Premiu al Meyor Cantar Camaretá de música
La Conseyería d’Educación y Cultura vien de facer pública nel BOPA la convocatoria de los Premios Lliterarios n’Asturianu correspondientes al añu 2.020: el “Xosefa Xovellanos” de novela, “Xuan María Acebal” de poesía, “María Josefa Canellada” de lliteratura infantil y xuvenil; “Máximo Fuertes Acevedo” d’ensayu , “Alfonso Iglesias” de cómic. Al tiempu, espublizáronse les bases pal “Nel Amaro” de Teatru Profesional y el “Premiu al Meyor Cantar Camaretá”. Los ganaores de la edición anterior d’estos premios foron Francisco ‘Paco’ Álvarez, Gonzalo González Barreñada, José Ángel Gayol, Ruma Barbero y Eladio de Pablo, como direutor de Factoría Norte.
Estos premios, creaos pa potenciar, consolidar y arriquecer la creatividá de la llingua asturiana nel ámbitu lliterariu, teatral y musical, tienen una dotación de 5.000 euros, nel casu de los lliterarios, y de 6.000 euros nel casu de los otros dos premios.
El plazu de presentación de les obres acaba’l 31 de xunetu nel casu de los premios lliterarios; el 16 de xunetu’l Premiu “Nel Amaro” y el 1 de xunetu’l “Premiu al Meyor Cantar Camaretá” y a ellos pue presentase cualisquier persona que nun ganare los mesmos na edición anterior. El fallu de los ganadores, como vien siendo vezu, va conocese nos caberos meses del añu.
Redaición InfoAsturies
This work is licensed under a Creative Commons Attribution 4.0 International License.
