• Portada
  • >
  • Sociedá/Llaboral
  • >
  • MANCOSI nun va anovar les furgonetes del repartu de comida a domiciliu y escueye privatizar el serviciu

MANCOSI nun va anovar les furgonetes del repartu de comida a domiciliu y escueye privatizar el serviciu

  • 17 Xunu, 2020

La Xunta de Gobiernu del ente supramunicipal que axunta a los conceyos de Villaviciosa, Colunga, Sariegu, Cabranes, Nava y Bimenes, nun solo decidió desatender definitivamente la reivindicación de les trabayadores d’anovar les furgonetes coles que se fae’l repartu de comida a domiciliu, sinón qu’optó por privatizar direutamente’l serviciu

El Comité d’Empresa de la Mancomunidá de la Sidra denuncia la progresiva privatización del serviciu de comida a domiciliu dientro del programa “Frayando Distancies”, dirixíu a afalar la permanencia de les persones mayores nel so propiu alrodiu, afalando la so independencia y torgando la so istitucionalización, como mediu pa sofitar una vieyera dina y la residencia nos sos llares. Esti programa, pioneru d’Asturies y que lleva furrulando con ésitu 18 años, abarca la totalidá de conceyos de la Mancomunidá, siendo nun entamu xestionáu y trabayáu direutamente por emplegaos de la mesma.

Sicasí, el serviciu d’ellaboración y envasáu de les comides lleva tiempu esternalizáu, siendo namás el serviciu de repartu la llabor del personal de la Mancomunidá. Estos trabayaores lleven tiempu reclamando l’anovación de dos les furgonetes col que se fae esi repartu y que, denuncien, tienen tanta antiguedá comu’l serviciu mesmu y percorrieron nos sos 18 años más de 500.000 km ca una, acumulando los consiguientes problemes de desgaste, les averíes y les evidentes complicaciones pa pasar la ITV, lo que tien comu consecuencia non solo una nidia falta de seguridá y falta d’acesorios -comu’l manes llibres o l’antivau- sinon un trestornu importante nel normal desendolcu del serviciu

En Setiembre de 2018 el Comité d’Empresa solicitó formalmente la sustitución de los vehículos citaos, pero en llugar d’eso los responsables de los conceyos decidieron privatizar el serviciu completu, lo que pente otres coses implica la renuncia de MANCOSI a la sovención de 7.000 que nesi conceutu tinía concedía de parte de la Conseyería de Desendolcu Rural y Recursos Naturales.

Al esmolecimientu del Comité d’Empresa pola situación na que van quedar les trabayadores que tán encargándose del serviciu anguañu –que amás cuenten con formación complementaria pa llevalu alantre y que la so función va muncho más allá del repartu de comida- súmase’l deriváu del empioramientu del serviciu, ya que la empresa que se fadrá cargu del mesmu ya demostró n’otres ocasiones la so política de redución de costes y falta de cualificación.

Mañana tendrá llugar una asamblea xeneral de trabayadores pa esponer la situación y valorar les midíes a tomar pa facer frente a esta privatizaciónu d’un serviciu públicu esencial.

Llucía F. Marqués


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies