La muerte de Celestina Sanchez, “Ca Sanchu” sedría una perda irreparable pa la cultura ya identidá asturianes… de nun ser porque la so voz, el so pergrande saber, foi reservada pal futuru gracies al llabor d’un ñetu incansable que recoyó los sos cantares y la presentó al mundiu comu una de les fontes más riques de la tradición oral asturiana
Celestina Sánchez Fernández, de Ca’Sanchu, morrió ayer n’Ambás (Grau), a los 98 años de edad. Ma de Sanchu d’Ambás, de la quesería Ca’Sanchu, foi una gran divulgadora de la música popular asturiana, gracies al so ñetu, Xosé Ambás, fundaor del archivu de la tradición oral que lleva’l so nome, y que con ella grabó abondos vidios y dos discos de cantares tradicionales: el grabáu col Muséu del Pueblu d’Asturies dientro la coleición “Fontes Sonores de la Música Tradicional Asturiana”, nel 2007, y “Bulita”, nel 2016.
Nun queremos facer de menos la tristura de los sos allegaos, que güei l’acompanguen nel so caberu alón, la so perda fae güei Asturies un pocu más probe; pero queremos dende equí dar les gracies a los que ficieron posible la so inmortalidá, a los que la sintieron y deprendieron d’ella, a los que la grabaron y espardieron la so voz, multiplicándola nes voces de nueves xeneraciones, faciendo d’una milenta y tornándo una parte de Celestina, cuasi etenra.
Gracies, “Bulita”, por trayenos dende la llende’l tiempu los sones y les pallabres del país. Qu’en paz aseles.
This work is licensed under a Creative Commons Attribution 4.0 International License.
