Entrevista a Mariano Suárez, mayestru escuela y Miembru de la Xunta Executiva d’Andecha Astur

  • 11 Maio, 2020

Alcuentros secretos nos que se remana información privilexada, obediencia centraliega, material de proteición a cargu de los propios trabayaores, ausencia de test y sobre tou, muncha incertidume pente los docentes asturianos. Mariano Suárez resume asina la “vuelta a la normalidá” de la escuela asturiana

 

  • ¿Tórnase a escuela o non? ¿Pues esclariar el marabayu de silencios y filtraciones qu’hai?
  • Cuandu Madrid apreba la desescalá, espubliza l’únicu documentu oficial qu’hai sobro ello. Diz: Na Fase I “los centros educativos abrirán pa la so desinfeición, acondicionamientu y el trabayu alministrativu y preparatoriu de los docentes y presonal ausiliar”; na Fase II dase la “apertura d’Infantil fasta 6 años pa families qu’acreíten que los proxenitores tienen de facer un trabayu presencial ensin posibilidá de flesibilización. Siempres con llimitacion d’aforu”.11 mayu: apertura de centros, desinfeición y organización del llabor. 25 mayu: a escuela los neños de 0-3 y de 3-6 si los dos pas trabayen, y a escuela l’escolináu d’Educación Especial que lo deseye. Ye’l 11 mayu y PSOE-Podemos nun gutien en Madrid, y Barbón achanta n’Uviéu. Nun espublizen istruciones oficiales pa xestionar les condiciones educatives y sanitaries d’esta torna a escuela. A los centros nun llega’l material necesariu pa la prevención (mazcarines, guantes, xeles, desinfestantes, termómetros por infrarroxos…). ¿Cómu se xestiona una prevención sanitaria con neños de 0 a 6 años o d’Educación Especial? Nun van ser los trabayaores de la enseñancia los que decidan si se puen tocar, si tienen que llevar guantes, qué se fae colos xuguetes que llamben, si puen compartir los cañicones… Tienen que ser les autoridaes les que regulen la “nuea normalidá” na escuela. Pero nun gutien. Y los neños de 0-6 años y d’Educación Especial tuvieron a puntu pasar de ser la población más protexío a ser la más espuesto, nun esperimentu temerariu y punible de “normalidá”, determináu pol gobiernu español PSOE-Podemos.

 

  • ¿Naide nun sabe ná, de verdá?
  • N’Uviéu, nos escuros pozos moqueta d’UGT y CCOO dalgunos lliberaos sí saben. Y nes sinuoses oficines de la Corrá l’Obiespu, el franciscanu y Comisariu Pontificiu Jesús Sanz Montes, tamién sabe. Porque’l 7 mayu, la Direutora Xeneral de Planificación ya Infracadarmes Educatives, Ana Isabel López Isla, caltién un alcuentru secretu (tal cualo) cola patronal del enseñu priváu y colos sindicatos d’esti seutor, ente ellos CCOO y UGT. Secretu porque denguna de les partes informa públicamente nin enantes nin dempués de la so cellebración nin del conteníu. ¿Cómu se supo? Porque dalgún lliberáu sindical fala más de la cuenta con dalgunos afiliaos y llueu vense obligaos a unviar una nota interna. Lo asocedío espárdese per tolos llaos, escueles, redes sociales…Asina, El Comercio del 9 mayu pue cuntalo too perfechamente. Asturies nun tien una alministración tresparente, la de Barbón ye tan opaca comu la de los honraos Areces y Riopedre. ¡Barbón permitiendo que Madrid gobierne en secretu la torna a escuela n’Asturies! ¡Barbón informando en secretu a la ilesia y a los sindicatos españoles!

 

  • ¿Qué anuncia la Conseyería nesti alcuentru secretu?
  • Enantes quiero resaltar la gravedá de la situación: un gobiernu públicu aconceyándose a lo callao cola ilesia católico (principal titular de les empreses privaes d’enseñancia) y colos sos sindicatos verticales. Mentantu les AMPES de les nueses escueles públiques y los sos sindicatos desespérense porque nin se-yos recibe nin se-yos dan noticies. Asina defenden PSOE y Podemos los sirvicios públicos. En fin, la Conseyería diz nesa xunta que por ellos sólo regresa a escuela l’escolináu de 2u Bachilleratu (preparación de la EBAU). Nun ven, comu diz el documentu de Madrid, que torne l’escolináu de 0-6 años nin el d’Educación Especial. Lo que quier la xente de Barbón ye que’l 18 mayu tornen a los centros sólo los equipos direutivos y el presonal alministrativu, non el profesoráu, básicamente pa xestionar la matriculación del prósimu cursu y la parte burocrática del piesllu d’ésti.

 

  • ¿Entós Barbón ta faciendo frente a Madrid?
  • Ah, non, eso en dengún casu. Si dalgo tien la xente a la que-y gusta’l poder ye que sabe ser obediente cuandu nun tien les de ganar. Esa lleción Barbón sábela de memoria, por eso lleva tola vida consiguiendo vivir de cargos públicos. Nesa mesma xunta secreta, la Conseyería dizlliteralmente qu’ellos “tán esperando les indicaciones del Gobiernu español”; y, anque nun lo reconoz, yá sondearon que Madrid “permitiría-yos” eses condiciones. Mentantu, otros territorios del estáu yá decidieron cuándu y cómu va ser esi retornu a escuela (Andalucía, Illes Balears, Euskalherria…). Sicasí, Barbón ta a la espera d’órdenes. Yá lo sabíamos, pero ye triste comprebalo otra vuelta: a Asturies nun la gobierna la presona digna, comprometía y decidía que merez; a Asturies gobiérnala un cabu chusqueru a les órdenes del Réxime borbónicu del 78. Nun sé qué fae esti cabu sentándose nel despachu de Belarmino Tomás.

 

  • Y esos equipos direutivos que se reincorporen a escuela ¿qué istruciones reciben?
  • Tarán nos centros el 18 mayu, pero de momentu naide nun-yos dixo ná. El BOE del 9 mayu, que regula’l furrulamientu la Fase 2, mandata una custión vergoñosa: nin el gobiernu PSOE-Podemos nin les Conseyeríes d’Educación van dar material de proteición a los equipos direutivos. El BOE carga la responsabilidá de mercar los equipos que considere necesarios sol direutor del centru. Y oblígalu a pagar esos equipos col presupuestu que’l centru recibe pal foncionamientu pedagóxicu. Falando claro: compra lo que veas, si compres poco o malo ye cosa tuya, quita perres a la educación de los neños pa pagalo porque nun vamos mandate un chapu… Más entá, tovía nun espublizaron nenguna istrución oficial sobro cómu se tienen d’aplicar les midíes de prevención sanitario nos centros educativos, igual quieren cargar esi muertu tamién nos llombos de los direutores. Llamentable cómu se ta tratando a los equipos direutivos nesti casu. Coincidiremos en qu’esto nun ye propio d’un gobiernu valiente que sepa exercer les sos fonciones, nin propio de quien presume de facer polítiques socialistes y populares.

 

  • ¿Qué se necesita pa xestionar con coherencia esta situación tan grave?
  • Son necesaries poques coses. Tolo más seyes:
    1. Suspensión del enseñu presencial fasta’l prósimu cursu.
    2. Facer test Covid19 a la plantía de trabayaores de la enseñancia (que polo menos son tan relevantes socialmente comu los fubolistes).
    3. Dotar a los centros de material suficiente de prevención sanitario (guantes, mazcarines, papel toballa, dalguna ropa de proteición básica pa situaciones especiales, xeles hidroalcohólicos, desinfestantes y termómetros por infrarroxos), pagao con presupuestos non ordinarios de los centros.
    4. D’equí a setiembre, que la Conseyería negocie colos sindicatos del enseñu y les confederaciones d’AMPES les condiciones educatives, profesionales y sanitaries pal empiezu del cursu 2020-2021.
    5. Llueu, que’l gobiernu asturianu espublice un manual ampliu y claru sobro la prevención sanitario nos centros educativos y sobro la nuea xestión de los procesos formativos nestes circustancies.
    6. Y, a lo cabero, que la Conseyería negocie col seutor un plan de previsión pal futuru, de mou que teamos preparaos pa retrucar educativamente énte un posible repunte del andanciu o crisis sanitaries asemeyaes, garantizando pa tol escolináu los drechos educativos y la igualdá nel so esfrute.

 

  • ¿Ves posible un final coherente pa esti despropósitu?
  • Va ser costoso, pero ta nes nueses manes. De fechu yá se dio’l primer pasu. L’alministración nun renuncia voluntariamente a esperimentar cola torna a escuela de la Educación Infantil y la Educación Especial, fáelo porque la presión social que nota yera fuerte y decidía. Ye un determín preventivu, porque golifaron fasta la posibilidá de fuelga nel seutor. Les y los trabayaores de la enseñancia tienen de ser claros desixendo lo que consideren necesario, na estaya educativa y sanitaria, tanto a l’alministración comu a los sindicatos. Yá nun ye que queramos condiciones llaborales dines y segures, ye que tamos xugando cola felicidá, la vida y el futuru de la población más valioso y más indefenso d’Asturies: les nueses neñes y neños. Si persiste una presión social suficiente, PSOE y Podemos dexarán de xugar a la ruleta rusa col escolináu y col profesoráu. Caltener unos sirvicios públicos seguros y de calidá ye una gran garantía de futuru p’Asturies.

 

 

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies