• Portada
  • >
  • Mocedá y reciella
  • >
  • Entrevista a Mariano Suárez, mayestru participante nel proyeutu del C.P. Tremañes qu´algamó dos distinciones nel SIMO

Entrevista a Mariano Suárez, mayestru participante nel proyeutu del C.P. Tremañes qu´algamó dos distinciones nel SIMO

  • 14 Payares, 2019

El proyeutu “Ada Byron y el Secretu Club de los Inventos”  vien de recibir, nel marcu de SIMO-Salón Internacional de Teunoloxía y Anovación Educativa (Madrid, payares 2019), dos distinciones: el Premiu a la Meyor Esperiencia STEAM  y el I Premiu a la Meyor Esperiencia Educativa Anovaora 2019, siendo escoyíu pente más de 200 esperiencies educatives. Entrevistamos a Mariano Suárez, profesor d’infantil del C.P. Tremañes, mayestru participante nel proyeutu de quien surdió la propuesta anicial del mesmu

 

Lo primero… ¿Qué tien de prestoso y qué tien de fadio ser mayestru?

Lo prestoso d’esti oficiu ye que tú llegues a escuela mui gallu creyendo que vas aidar a la reciella a descubrir el mundiu y a conocelu, pero, col tiempu, daste cuenta de la verdá: trátase d’un oficiu nel que mayestru y escolináu caminen xuntos descubriendo, caún a la so manera, pero al empar, lo que la vida-yos da. Y esa nuea forma de ver l’oficiu, la de caminar ún al llau del otru descubriendo xuntos lo qu’hai pel camín, ye lo más guapo.

Lo más fadio de ser mayestru ye siempres el tratu cola alministración, especialmente cola que deberíes considerar “propia”. Llevantase tolos díes sabiendo qu’a los xestores políticos que tien Asturies impórta-yos poco tanto la condición de sirviciu públicu del enseñu comu la so esencia asturiana ye mui duro. Ye duro abrir ca mañana la puerte d’un sistema que marxina la to identidá asturiana y prohibe la oficialidá del to idioma. Ye duro saber que mires polos recursos pa guetar la mayor calidá, mentantu bendicen a Areces diciendo que nun sabía lo que facíen Riopedre y María Jesús Otero, o ver cómu éstos tienen condergues mínimes y agora tán xuntando cromos pa un indultu esprés.

 

Fálamos un pocu del proyeutu premiáu. ¿qué tien d’anovaor? ¿Alcontrásteisvos con dificultaes pa implementalu?

Ye importante señalar que ye un proyeutu de tola comunidá educativa del Colexu Tremañes (Xixón), magar que yo facilitare la propuesta anicial del mesmu. Ensin el compromisu y la xera colleutivo ná nun ye posible. Ye un proyeutu p’afalar la igualdá de xéneru na Cencia y na Teunoloxía, per aciu’l deprendimientu por sirviciu, la metodoloxía costructivista, el trabayu coperativu y l’usu de les TIC. El so diseñu sofítase en 5 de los Oxetivos de Desenrollu Caltenible de la ONU y nun enfoque metodolóxicu STEAM. Nél implicáronse, acompangaos por 23 mayestros/es, les 222 neñes y neños del colexu, les sos families y un equipu de 20 científiques de primer nivel. El proyeutu ñaz cola visita al centru d’una actriz carauterizá comu Ada Byron, que mos plantega un retu de deprendizax. Poro, entamamos el Secretu Club de los Inventos, investigamos inventos ya muyeres inventores, conocemos el papel de la muyer na Cencia y na Teunoloxía, caltenemos alcuentros-taller con 20 científiques, creamos inventos propios, ellaboramos hestories con “Story Cubes”, prauticamos el camientu diverxente, prauticamos el trabayu coperativu, sirvimos a la comunidá consiguiendo donaciones pal Istitutu Universitariu d’Oncoloxía y donando los nuesos inventos a les Aules Hospitalaries, creamos l’Espaciu Esperimental y Sensorial “Margarita Salas”, creamos l’Aula del Futuru “Rosa María Menéndez”, facemos una esposición pública del proyeutu (pesllá por Margarita Salas y la presidenta del CSIC, Rosa María Menéndez), etc. Y cuandu díbemos llogar les recompenses pautaes (una medalla al xeniu inventivu y el Gran Baille de la Lluz Prieto), el malváu profesor Augustus de Morgan secuéstrales y tenemos de rescatales nuna sesión de “Escape Room”. Too emplegando portátiles, tabletes, PDI, gafes virtuales, robótica infantil, croma…

 

Aparte del programa Ada Byron, ¿les tos clases siguen el patrón clásicu  o trabayes de manera estremada?

En Tremañes nun tien dengún sentíu falar de fae un solu mayestru. El colleutivu docente, col sofitu de la comunidá escolar, tien un apueste estratéxicu pal futuru d’aquella escuela: trabayar por proyeutos y arrenunciar progresivamente al usu de los llibros de testu. Educación Infantil lleva trabayando asina más de venti años y Educación Primaria ta finando agora’l el so procesu de tresformación metodolóxica. Ellí nun creyemos que deprender seya memorizar conteníos que te xestiona, te presenta y te cobra enforma una gran empresa editorial. Afitamos que deprender ye ser quién a guetar la información necesario, a xestionar colleutivamente los conteníos y a aplicalos afayaízamente a les tos necesidaes. Creyemos qu’una mayestra nun ye una presona que tien de saber de too; pero sí ye una presona que tien de saber xestionar conocimientos ya información que tope en cualisquier formatu, y tien de ser una esperta en procesos de deprendizax. Poro, trabayamos por proyeutos trimestrales d’investigación, con temes mui estremaos; dalgunos temes puen paecer más “normales”: los astures y los romanos, la mar, facer una esposición pictórica real con variedá de téuniques y estilos artísticos…; otros puen paecer más peculiares: espublizar un periódicu impresu en formatu real, espublizar un llibru “de verdá” (llegal y con tapes dures) tres un procesu de “crowdfunding” y l’entamu nel barriu de tres puntos de llibros llibres, o facer la xeollocalización dixital del barriu consultable al traviés d’una aplicación de móvil. Y comu creyemos que l’enseñu ye responsabilidá de tola tribu, nos nuesos proyeutos participen siempres les families aportando información y recursos, talleres, contautos… Asina comu participa siempres la Biblioteca Municipal de La Calzada y munchos espertos que collaboren con nós en ca tema que trabayamos.

 

Trabayes con reciella mui pequeño, ¿eso ye una dificultá añadío o una ventaxa?

Yo soi mayestru d’Educación Infantil. Trabayo con presones de 3, 4 y 5 años. Esa edá nun ye una torga nin una ventaxa, vitalmente ye una circustancia y profesionalmente pa mí ye una vocación. Ye verdá que xestionar procesos de deprendimientu con un públicu qu’entá nun algamó una autonomía presonal y procedimental plena ye una situación peculiar. Pero pa mí ye impagable poder acompangalos nos proyeutos y dir xuntos descubriéndomos y conociendo la vida, porque la so visión del mundiu ye única y la so ilusión contaxoso.

 

¿Qué papel xuega’l cientru nel  modelu educativu? ¿Y les families?

Bono, yá dixe que’l proyeutu educativu que lleva alantre la comunidá educativa de Tremañes ye un apueste colleutivu. Ensin el compromisu del profesoráu ye inviable. Ensin la collaboración de les families ye imposible. Y ensin l’esfuerciu diariu d’un equipu direutivu voluntariosu y visionariu (nel bon sintíu la pallabra) sedría sólo un pruyimientu.

 

¿Cómo remembres el to pasu pela escuela?

A mí prestóme y préstame muncho’l pasu pela escuela. Soi mui cosciente de lo inorante que soi, tenemos de reconocer qu’eso ye condición homana, y esfruto descubriendo coses nuees. Home, tamién hai situaciones enguedeyaes: consiguir una plaza escolar cuandu yo yera neñu suponía tener cuasi unos pas superhéroes (pola escasez de places), o tener 16 años y sintise na necesidá de participar nos conceyos estudiantiles na Universidá Llaboral escontra les primeres contrarreformes educatives del PSOE. Pero yo creyo que si soi mayestru foi gracies al primeru que tuvi, Xurde, nel Colexu Rei Pelayu (Xixón); el prubrín morrió bien mozu pero diome tiempu a conocelu p’almiralu tola vida.

 

De magar entós ¿los cambeos foron a meyor o a pior? O tamos igual…

Mentantu la Escuela Pública Asturiana la gobiernen partíos d’ámbetu y d’intereses españoles, da igual que’l Reinu d’España mos tenga concedíes (emprestaes) o non les competencies educatives. Col pasu’l tiempu siempres vas viendo que les sucesives reformes educatives alloñen la escuela de la so condición de sirviciu públicu, recurtiando los presupuestos necesarios y emburriando haza la xestión privao cuantos seutores puen. La esquierda española sofita los conciertos y sovenciona tanto comu la drecha la rede d’empreses privaes del enseñu. La esquierda española, igual que la drecha, siempre fae del enseñu un preséu políticu p’aculturizar y someter a los asturianos, alloñándolos de la so identidá, ñegándo-yos la so hestoria, torgándo-yos la so llingua…

Lo que quier el sistema con esto ye que les empreses d’emplegu temporal del Reinu d’España puean poner nun mercáu llaboral una bandexa de forespán con tres trabayaores plastificaos dientru, comu la fruta. Abres la bandexa y los tres tendrán el mesmu aspeutu, falarán el mesmu español, sometenránse igual, esprimiránse de la mesma manera, sofrirán del mou previstu… Eso sí, comu les mazanes tresxéniques, sedrán inodoros ya ensin sabor.

Poro, préstame abondo que les asturianes y asturianos caltengan entá una resistencia. La resistencia a desapaecer comu talos na cai, nel tayu, na escuela, na nuesa tierra… Esi baltir ye’l que tien d’alitar la reforma educativa pola que yo naguo. Somos munchos los que mos llevantamos ca díi con ganes d’eso. Asina qu’Asturies tien futuru.

 

¿Cuál ye’l retu más importante al que s’enfrenta la educación güei?

El retu más importante que tien la Escuela Pública Asturiana ye sobrevivir pa facilitar la educación del pueblu al que sirve. Sobrevivir a la privatización. A los políticos españoles lladrones. Al tapecimientu la nuesa identidá. El retu paez descomanáu. Pero toi seguru de qu’Asturies nun deseya la privatización de los sirvicios públicos. Asturies nun quier lladrones con coche oficial y deseya sentencies exemplares pa ellos. Asturies nun renuncia voluntariamente a la so hestoria y a la so llingua. Entós, siendo asina, ye que yá tamos caminando haza la solución, igual avanzamos mui selemente, pero de xuru que creyendo eso tamos costruyendo’l futuru d’una Asturies pa toes y toos.

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies