Irresponsabilidá, secretismu y falta de competencies na reapertura les aules el 25 de mayu

  • 9 Maio, 2020

Andecha Astur denuncia’l secretismu ya irresponsabilidá col que se ta xestionando dende Madrí la vuelta a les aules de los escolinos de 0 a 6 años. L’apertura de cientros tendrá llugar esti mesmu llunes y la incorporación d’escolinos d’infantil, si los indicaores de la desesguilada lo permiten, el 25 de Mayu, ensin que’l gobiernu d’Asturies tenga capacidá pa decidir al respeutu

La “reentrada” nes aules caltién en vilu a families y profesores, naide nun recibe información dala y ante’l silenciu del gobiernu español y de la so obediente sucursal asturiana, los profesores desconocen la formación y medios cola que cuntarán pa cumplir coles estrictes normes de seguridá vixente.

Na Fase I “los centros educativos abrirán pa la so desinfeición, acondicionamientu y el trabayu alministrativu y preparatoriu de los docentes y presonal ausiliar” Eso ye’l llunes, en dos díes, pero los profesores nun saben siquiera si tienen qu’acudir a los cientros.

Y na Fase II dase la “apertura d’Infantil fasta 6 años pa families qu’acreíten que los proxenitores tienen de facer un trabayu presencial ensin posibilidá de flesibilización. Siempres con llimitacion d’aforu”. AMPAS y docentes quieren participar de la negociación na torna con garantíes educatives, profesionales y sobro tou sanitaries, pero les decisiones tómense’n Madrí y a puerta presllada y la información aporta con goteru.

Nun ta previsto, que se sepa, pasar testCovid19 al profesoráu. Nun se garantiza que les escueles tengan material preventivu (guantes, mascarines, xeles, termómetros por infrarroxos…).

“Nin Madrid nin Barbón espublicen istruciones oficiales que regulen la rellación espaciu/presona, ratios educatives, convivencia del escolináu, usu d’espacios escolares compartíos, desinfeición de materiales comunes, etc.” denuncien dende Andecha Astur. El sindicatu d’estudiantes SUATEA alvierte a les families de que, “nin n’infantil nin n’educación especial los profesores van poder cumplir las mínimes normes sanitaries pa que’l cientru seya seguru”.

Les dudes son munches. ¿Cómu caltener a la reciella allonxada dos metros pente sí, ensin xugar con otros nin compartir xuguetes? ¿Cómu facer que nun posen mazcarines nin guantes? ¿Controlaráseyos la temperatura? ¿qué facer si ún se pon malu? ¿de quién ye la responsabilidá de los posibles contaxos? ¿comu camudar pañales y dar biberones? ¿pueden compartir baños? ¿tendrá’l profesor que camudar de ropa ca vegada que pase d’un rapacín a otru? ¿Qu’equipación llevarán los profesores? ¿podrán garrar a los neños en cuello? ¿habrá desinfeición continua d’aules, comedor, patios, pasiellos y baños? Remembremos que falamos de bebés y rapacinos mui piqueños, que xueguen embaxu y lleven tou a la boca.
El riesgu ye grande y la reciella pasaría de ser un de los coleutivos -xunto colos mayores- más protexios, a ser el más espuestu, amás de costituyir un factor de contaxu emportante.

Poro, dende Andecha Astur anuncien que sofitarán cualisquier aición por parte de los AMPES o sindicatos del enseñu comu rempuesta a la irresponsabilidá de los dos gobiernos ya isten a Barbón, “magar que tea cómodu na incompetencia na que lu dexó l’estáu d’allarma” a  desixir la suspensión fasta setiembre del enseñu presencial y, mentantu, la negociación coles confederaciones d’AMPES y los sindicatos del enseñu, la facilitación de recursos suficientes y normatives ñidies pa la prevención sanitario.

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies