La muerte a los 74 años d’edá, por coronavirus, del policía franquista y “presuntu” torturaor José Antonio González Pacheco, alias Billy el Niño dexa ensin posibilidá de xusticia a les sos víctimes; sicasí, hai munchos otros sobro los que la xusticia pue posar la vista anantes de que muerran ensin pagar polos sos crímenes
Conocíu pol so sadismu y crueldá a la hora de torturar a estudiantes y obreros antifranquistes nos años 70, morrió anantes de la resolución de la querella que les sos víctimes presentaren ante’l Comité de Drechos Humanos de la ONU, depués de que la demanda nun prosperare en dalu tribunal español. Dengún de los gobiernos españoles facilitaron les coses pa que se xulgara a esti siniestru presonaxe, pesi a la multitú de testimonios a la so escontra, una amuesa más de la impunidá de los crímenes facistes.
L’axente de la Direición Xeneral de Seguridá morrió coles distinciones que recibió pol so espediente policial, cuatro medayes, de les que 3 recibióles por parte de los gobiernos “democráticos”, y cuyos beneficios económicos (que representaben un 50% más na so pensión) foron afitaos y reconocios nel 2010. En febreru d’esti mesmu añu el votu conxuntu d’Unidas Podemos, PSOE, PP, Ciudadanos y Vox en contra de facer públicu en so espediente policial permitió que viviere fasta’l caberu díe en llibertá, con honor, medayes, condecoraciones y pagues del estáu.
La muerte de Billy el Niño recalca la necesidá -y urxencia- de reclamar xusticia sobro tolos represores que mientres la dictadura española exercieron n’Asturies y güei siguen la so vida con absoluta impunidá. Pente ellos el policía Pascual Honrado de la Fuente, man drecha na Brigada Políticu-Social de la dictadura n’Asturies, ya’l Teniente coronel de la Guardia Civil Fernando Caro Lería, investigaos na querella Arxentina, o’l cabezaleru sindical mineru del SOMA-UXT y home fuerte del PSOE n’Asturies mientres la Transición, José Ángel Fernández Villa, reconocíu chivatu y delator énte’l xefe de la Brigada Politico-Social d’Asturies, Antonio Garrido Fernández, policía del Políticu social y infiltráu na UXT, Julio Bregón, de la Brigada Políticu-Social, o Palacios, tamién policía de la Brigada Políticu social, toos ellos con una vida tranquila y sofitada pol estáu español, que s’encargó de facilitayos bonos puestos y pensiones pal restu la so vida.
La llista podría siguir, pero’l resume siguiría siendo’l mesmu. Los asturianos nunca vieron nin siquier reconocíos los crímenes que contra ellos se cometieron. Cuarenta y cincu años dempués, la dictadura española ta vixente y los sos lleales caltienen la impunidá énte cualquier tipu de crime; los fieles y los sos sucesores son inclusive parte importante de los pegoyos sobro los que se sofita la democracia española y atópense’n tolos ámbetos de poder. Franco, como bien dixo, dexólo tou atao y bien atao.
Llucía F. Marqués
This work is licensed under a Creative Commons Attribution 4.0 International License.
