La declaración de la renta d’esti añu aporta nun escenariu poco avezáu, pero especialmente sensible a la xestión presupuestaria y al destín que se da a les perres de los ciudadanos. Un tanque cuesta lo que 440 respiraores, lo mesmo que’l salariu mínimu d’un añu pa mil families; col coste de ca disparu d’esi mesmu tanque val lo mesmo que 90 tests de coronavirus
Por muncho que l’estáu español aprofitare la cris sanitaria pa militarizar les nueses cais y por munchu llaváu de cara que quieran dar al exércitu, el pueblu sabe onde ta lo emportante y nos caberos tiempos multiplíquense les pidiciones de que se desvíe a gastos sanitarios los destinaos a caltener tantu la ilesia comu la corona, los sueldos vitalicios de los políticos y mui especialmente’l gastu militar.
Nesi interín, remembramos que en casu de tar en desacuerdu con que l’estáu español remane les nueses perres, esiste la posibilidá de ñegase a collaborar col estáu a traviés de la Oxeción Fiscal al Gastu Militar, una idega puesta en marcha nel 2004 y que consiste na desobediencia activa al facer la declaración de la renta, aprofitando el so furrulamientu pa desviar parte de los impuestos a un proyeutu solidariu.
La oxeción pue ser dende un euru p’alantre y ta al algame de cualisquiera que presente declaración, el sistema ye fácil y equí apurrimos un enllaz nel que alcontrar un detalláu tutorial de comu la facer. La idega ye básicamente facer una donación a una entidá que trabaye con fines sociales -recomienden especialmente aquelles que nun reciben sofitu gubernamental, incluyendo nel conceutu “Oxeción Fiscal al gastu militar”, guardar el recibu y descontar lluéu eses perres de la declaración de la renta incluyéndo esi gastu en “Retenciones y demás pagos a cuenta” (recomienden el separtau 606). Con ello eses perres desgrávense y nun van a parar al estáu,
Darréu, unvíase una carta al Ministeriu de Facienda anunciando que fixiste la Oxeción Fiscal y desplicando los motivos, acompangando’l comprebante del ingresu y guardando copia de tou ello. Pa visibilizar esta oxeción, rellénase la encuesta http://objecionfiscal.info/ cola que se lleva cuenta del total oxetáu en tol estáu.
Esti movimientu furrula n’Asturies va 16 años y dende va décades n’otros países comu Alemania, Holanda, Canadá, EE.UU, Francia, España o Italia,variando la so orientación dende’l puru pacifismu a la oxeción dafechu al estáu que recalda.
Llucía F. Marqués
This work is licensed under a Creative Commons Attribution 4.0 International License.
