L’otru andanciu: les velutines

  • 28 Abril, 2020

Voluntarios acreditaos o empreses autorizaes continúen col trampéu pa prindar el mayor númberu posible de reines de velutines, pero la menor presencia humana torga la llocalización de ñeros y facilita’l so espardimientu

Esti añu ye especialmente abegoso’l control de los casiellos que pudiere haber en biesques o alta montaña, onde la presencia humana baxó radicalmente, y ye precisamente agora cuando se dexen ver les consecuencies de la llentitú cola que se reacionó a esti andanciu. Nel 2016 aportaron les noticies de los primeros ensames de velutina pel Ocidente asturianu dende Galicia. Les midíes entardaron en tomáse y nun foron efeutives, rexistrándose l’añu pasáu esperes de más de 100 díes pa proceder a la retirada de ñeros llocalizaos. Esta especie invasora, qu’entró dende Galicia alrodiu l’añu 2016, espárdese con rapidez y la so alimentación a base d’abeyes pon en peligru, non solo los casiellos, sinón la mesma agricultura, ya que más del 60% de los cultivos dependen d’elles pa la so polinización.

Ayeri cazáronse más de 4.000 reines de viéspora velutina namás nos conceyos de Belmonte y Candamo, otres mil en Cangues y más de 1.800 en Tinéu; a entamos de mes Grao superó les 3.000 captures, unos datos que da idega del descomanáu espardimientu que ta teniendo esti andaz n’Asturies.

Les aiciones empobinaes a finar con elles dependen entá de la collaboración ciudadano y de los voluntarios que, previa acreditación, salen a atender les trampes (nesti intre teniendo que curiar amás toles midíes de seguranza impuestes pol coronavirus).

La revisión primaveral de les trampes faese ca 15 díes y ta alcontrándose nelles un peraltu indiz de reines. De nun baxar el ritmu, plantégase l’ampliación de la temporada primaveral -época de gran emportancia por ser les feches nes que les nueves reines creen los sos ensames- a lo llargo tol mes de Mayu.

Vitor Corte

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies