La compañía ferroviaria implanta esti llunes en tolos sos trayeutos el billete presonalizáu, que fuercia a dar información de calter presonal, comu’l númberu de teléfonu, nome y otros datos de contautu.

Renfe anuncia esta novedá en plenu estáu d’alarma pol andanciu del coronavirus, col argumentu de poder contautar colos viaxeros en casu d’alerta sanitaria -comu la confirmación d’un pasaxeru infeutáu y la llocalización de posibles contaxos- o de rexistrase dalguna eventual incidencia na circulación de los trenes. Les “eventuales incidencies” yá anantes de la cris yeren diaries n’Asturies, onde los caberos años les suspensiones de trenes, averíes y retrasos algamaron cifres descomanaes.

Nun entamu la midía afeutará a los billetes mercaos nes estaciones o al traviés de teléfonu y apps, siendo posterior la incorporación a la mesma por parte de les axencies de viaxes. Nes estaciones ensin taquilla -toles que rexistren menos de 100 viaxeros al díe- los pasaxeros tendrán d’introducir los sos datos na máquina espendeora o reservar billete previamente por teléfonu o interné. Considerando que nes fasteres rurales la gran mayoría de los usuarios de ferrocarril son presones d’avanzada edá, esto podría suponer una complicación importante a la hora de sacar el billete.

Por agora, daes les actuales midies de restrición de la movilidá, namás circulen el 10% de los trenes, nos que sólo pueden tar ocupaes el 30% de les places, col envís de garantizar les distancies de seguridá pente pasaxeros recomendaes por Sanidá.