Tres nuevos cantares que van asoleyar a les 21.30h na so canal de YouTube dan forma a un curtiu dirixíu pol realizador Titi Muñoz
Esti 2020 Misiva cumplen 10 años faciendo punk-rock y pa cellebralo embárquense nel so proyeutu más ambiciosu: poner música a un curtiumetraxe. El vienres 24 d’abril a les 21.30 hores, na canal de YouTube de Misiva, va estrenase ‘L’Últimu Aliendu’, obra de calter “post-apocalípticu” qu’entemez el bon facer de Titi Muñoz -reputáu realizador asturianu que ganó un premiu AMAS en 2019 na estaya de meyor videuclip- y el d’esta banda moscona -que tien cuatro discos al so llombu y que tocó en prestixosos festivales como’l Resurrection Fest y el Tsunami Xixón-. El teaser d’adelantu yá se pue ver en YouTube.
‘L’Últimu Aliendu’ ta formáu por trés nuevos cantares -”Esclavos del Momentu”, “Héroes Ensin Nome” y “Qu’Arda’l Sol”-, toos ellos cantaos n’asturianu dafechu y con un mensaxe de denuncia social y optimista a la par; mui afayadizos pa estos tiempos que tamos viviendo. Musicalmente reflexen la madurez de Misiva, con un soníu más rockeru, pero ensin perder de referencia el punk-rock d’influyencia anglosaxona que los caracteriza. Grabaos nos OVNI Estudios de Pablo Martínez (Desakato) y masterizaos n’Estaos Xuníos por Brad Boatright, estos temes van asoleyar tamién en forma d’EP el sábadu 25 en toles plataformes dixitales.
Con esti estrenu, Misiva entamen a celebrar el so décimu aniversariu. La banda programara una proyección d’esta “roadmovie” nel Teatru Filarmónica d’Uviéu, pero a cuenta de la crisis del COVID19 tuvieron que cancelala. Agora va ser en YouTube onde van estrenar el videu pa compartilu con tola xente que ta sufriendo’l confinamientu. Dempués llegará’l conciertu especial de celebración, programáu pal 4 de setiembre na sala Tribeca d’Uviéu y nel que van actuar xunto a Amplify.
Redaición InfoAsturies
This work is licensed under a Creative Commons Attribution 4.0 International License.
