Iniciativa pol Asturianu entregará’l premiu en cuantes que la situación lo permita

El concursu entamáu por Iniciativa pol Asturianu baxo’l títulu #andanciulliterariu tien yá fallu del xuráu. El primer premiu ye pa Gonzalo Llamedo por “Y agora col presente dormíu”, el segundu premiu pa Xuan Miyar por ” La ñube metía…” y el terceru p’Ataúlfo Gamonal por “Dende’l primer día”.

El xuráu tuvo compuestu pol profesor Fonsu Martín Sánchez y la escritora María Luz Pontón Álvarez, actuando como secretariu ensin votu’l presidente d’Iniciativa pol Asturianu, Iván Llera.

La temática del concursu, que se fexo al traviés d’espublizaciones en twitter col hastag #andanciulliterariu, yera les vivencies de los escritores nesta situación que vivimos anguañu. Los trés meyores testos n’opinión del xuráu  llevarán un premiu consistente nun llote de llibros que yos sedrá entregáu en cuantes fine l’aisllamientu.

Iniciativa polAsturianu valora la participación nel concursu y agradez abondo l’espardimientu y collaboración de los y les internautes na campaña nestos momentos d’andanciu de coronavirus, considerando algamáu’l so oxetivu d’afalar a la creación lliteraria n’asturianu y la presencia de la llingua nes redes.

Redaición InfoAsturies

This work is licensed under a Creative Commons Attribution 4.0 International License.