L’ Asociación Agraria de xóvenes Agricultores denunció esti sábadu la entrada de cisternes de llechi concentrao a baxu preciu viniente d’otros países

La continuidá de l’actividá ganaero nes actuales circustancies ye al tiempu difícil y necesario. Les llecheries asturianes pueden abastecer a la población de productos llacteos, garantizando’l soministru nel tiempu y calteniendo con vida les fasteres rurales, pero la compra de productos foriatos baxa los beneficios al puntu de poner en pelligru la continuidá de munches esplotaciones.

La entrada de llechi de los países con escesu de produción tórnanos en “sumideru de los sos escedentes”, daqué que, sigún alerten los ganaeros, distorsiona’l mercáu internu y balta’l preciu percibíu polos productores nacionales, ensin qu’ello revierta’n beneficiu de los consumidores finales. Esa llechi, amás, procede de grandes esplotaciones llecheres nes que’l bientar animal nun ye nin de lloñe tan controláu comu nes  asturianes.

Poro, desixen  a la Xunión Europea qu’intervengan pa controlar el mercáu llácteu européu y al Gobiernu d’España y al del “Principado” que faigan un estrictu control y xixilancia del destín d’eses cisternes, ya que n’ocasiones ye envasada y vendía comu asturiana torgando’l drechu del consumidor a decidir l’orixe de los productos que consume.

Llucía F. Marqués

This work is licensed under a Creative Commons Attribution 4.0 International License.