Malque la convocatoria ñació na cai más sidrera d’Uviéu, nel famosu Bulevar de la Sidre, en Gascona, l’espardimientu de la mesma a tol país torna l’echáu simultaniu d’esta tardi nun eventu nacional

Nun ye que faiga falta que mos provoquen muncho pa qu’echemos unos culinos, dende qu’entamó l’empreslle les amueses de Cultura Sidrera nun apararon d’apaecer: xente echando sidre pela ventana -la propia o a la del vecín-, retos internautas d’echáu de culetes, videogrupos de tastia de sidre, vermús sidreros… fasta ta afitándose’l serviciu de telesidre a domiciliu por parte de munchos llagares.

Lo que tien d’especial la cita de güei ye eso, que ye una cita. Trátase de que tolos asturianos salgan a echar unos culinos a la ventana al mesmu tiempu, a les ocho y media la tardi de güei vienres, pa entamar con ganes el finde. La propuesta nun se trata namás de pasalo bien y facese la ilusión de que tas en chigre col vecín, sinón que quier llamar l’atención sobre’l duru guelpe que ta siendo esti andanciu pal seutor sidreru, tanto no que cinca a chigres comu a llagares. Afita tamién el compromisu de los asturianos de nun dexar cayer esti seutor, perimportante na nuesa economía ya imprescindible na nuesa cultura.

Pa facer más prestosa la cuestión, 19 Djs d’Uviéu, Xixón, Avilés, La Fresneda, Siero, Llaviana, L.lena, Valdés, Veigadeo…) confirmaron el so sofitu musical, aniciando, eso si, col Asturies Patria Quería.  Amás d’ellos son munches les cares conocies qu’anunciaren estos dies la so participación nel eventu: la surfista Lucía Martió, el piragüista  Javier Hernanz, el cantante Vitor Manuel, el fubolista Santi Cazorla, l’actriz Marina San Jose, la presentadora Luján Argüelles ya unos ochenta bloggers ya influencers, que recibieron na so casa una botella especial pal eventu.

El restu la población tendremos que conseguir la sidre per otros medios: en tolos supermercaos y munches tiendes puen alcontrase botelles, pero si somos más repunantes y queremosla d’un palu concretu, namás hai que llamar y pidila: la mayoría de los llagares tienen en marcha un serviciu de sidre a domiciliu. La revista LA SIDRA cuenta tamién con una interesante tienda sidrera online, La Sidra Shop, onde podemos topar, amás de la sidre natural d’echar, otres prestoses variedaes, productos asturianos, llibros sidreros y, importante pa quien tenga poco vezu, echaores llétricos.

Llucía F. Marqués

This work is licensed under a Creative Commons Attribution 4.0 International License.