Entrevista a Miguel Ánxelu Agudo Rodicio, enfermeru nel HUCA

  • 11 Abril, 2020

Miguel Ánxelu Agudo Rodicio, enfermeru del HUCA reconocíu pola so campaña reclamando más recursos pa la Sanidá Pública, retrata la situación del hospital asturianu ensin dramatismos y al tiempu con precaución, recalcando’l bon trabayu de los profesionales asturianos nel andanciu

 

¿Cómu se ve dende dientro la xestión d’esta cris sanitaria? La falta de material, personal y medios ¿vieno dada pola pandemia o ya yera previa? ¿Qu’echasteis en falta, qu’erros visteis? Y también ¿Qué se fizo bien?

Equí n’Asturies la xestión a “groso modo” nun la vemos tan mal. Coles carencies que toos sabemos de personal y delles vegaes material. Inténtase dir per delantre dellos díes y paez que se ta algamando.
Por exemplu zarrando plantes y preparándoles p’atender n’esclusiva los repuntes de la infeición que tamos padeciendo.  Otres plantes piesllen pa poder tener disponible a esi personal a midía que los profesionales van cayendo enfermos.
Erros al entamu munchos, colo que respeuta al manexu de los contautos con positivos confirmaos. Asina como la falta d’humanidá, empatía y respetu pa col personal d’enfermería y sanitario al que nun apurríen mazcarines nin mos dexaben poneles. Llegando a argumentanos na Sala Conferencies del HUCA “Que qué queríemos. Que sabíemos la profesión que coyiéremos y los riesgos qu’esta conlleva”, too ello pa nun dexamos poner mazcarines énte la escasez que prevíen. Por embargu tolos mélicos diben cola so mazcarina dende qu’entraben pola puerta l’HUCA. Como la xente escomencipió a remontase pola mor d’esi agraviu comparativu frente al colleutivu mélicu (aclaro qu’ellos nun tiníen nada que ver) tuvieron que dar marcha atrás a esa orde y permitinos pidiles a les supervisores.

Los protocolos va marcándolos la OMS y varíen caldía sigún van sabiendo más del covid-19.

El material si cabe agora na mio xunidá hai más qu’enantes dende que ye de tratamientu covid+. Si bien nun mos apurren gorros y los qu’algamamos foi gracies a una llimpiadora y un traumatólogu qu’al saber cómo tábemos marchó con dos caxes de quirófanu pa nós. El circuitu de les gafes proteutores vien cada dos hores, anque dalguna vegada nun llega y hai que quedase más tiempu del recomendáu col EPI puestu dientro la fastera sucia (la contaminada por covid19), yá que si saliéramos a lo llimpio nun tendríemos material pa entrar a atender a un paciente que lo necesitare.

 

– ¿Fízose al personal -sanitariu y non sanitariu- el correspondiente control y prebes del coronavirus? ¿Aumentáronvos los turnos?

Eso ye otra carestía que carecemos. Hai compañeres que trataron durante selmanes a pacientes que resultaron covid+ en xunidaes d’hospitalización “normales” y nun se-yos ta faciendo nin PCR nin test rápidos nin nada.
Si cais con síntomes tando nuna xunidá de tratamientu a covid+ (como foi’l mio casu) fainte aina una PCR y al día siguiente dante’l resultáu. Si ye negativu o indeteutable mándente de vuelta a la xera de sópitu, ensin curentena nin la segunda PCR de los 7 díes.
Yá salió un escritu de la xerencia l’Aria IV que diz que mos van a xubir la xornada llaboral a les hores que tiníemos na dómina de Rajoy, pero de momentu nun mos modificaron el cuadrante. Supongo que ye en previsión de quedar ensin profesionales, porque yá nun hai naide en bolsa.

 

– ¿Atendisteis a munchos “turistes” del andanciu? – ¿Cómu afeutaron les midies esceicionales a les ya saturaes llistes d’espera y a l’atención d’otres enfermedaes?

Turistes foriatos nun tuvi dengún ingresáu. Lo que si tuvi foi a la inversa, asturianos que marcharon pal sur a la so segunda residencia y al entamar a sintise mal tornaron pa equí; dalgunu morrió de fechu.

Les llistes d’espera, como ye llóxico tan retrasándose tolo que dure esti estau esceicional que ye’l que se ta llevando tolos recursos, materiales y humanos.

 

– Tenemos muncha información de lo que ta pasando n’España, especialmente en Madrí, pero pa los que tamos fuera de los hospitales ye complicao saber si n’Asturies se dan eses mesmes situaciones. ¿Hai desemeyances pente lo que pasa equí y allí?

 Yo puedo falate del HUCA que ye au trabayo dende fai más de venti años. Zarráronse munchos servicios pa reconvertir les sos xunidaes d’hospitalización en Xunidaes Covid19+ o de sospeches de covid19. Entamamos siendo 3 plantes, la mio foi la tercera en reconvertise, y anguaño somos una montonera d’elles.

Práuticamente toles UCI son de tratamientu pal covid19 y reacondiciónense REA’s n’UCI y CMA en REA (pa los que nun conozan les siegles: UCI ye Unidá de Curiaos Intensivos, REA ye la reanimación postquirúrxica, CMA ye la de Ciruxía Mayor Ambulatoria).

Yá sacaron de les xunidaes d’hospitalización a toles enfermeres col perfil d’UCI, ello ye col máster de curiaos intensivos, pa llevales a dichos servicios.

Otres plantes peslláronles pa tener a esi personal disponible como dixi más p’arriba.

La planificación inicial del repartu de pacientes tuvo que ser modificada énte la incidencia y virulencia de la malura.

No que mos estremamos de Madrid ye claro. Una menor incidencia y meyor planificación d’infraestructures y de recursos humanos y materiales. Si bien sigo viendo deshumanización de los nuesos gobernantes del Principado y xestores del SESPA pa col personal sanitario, paez que nun-yos importamos.

 

-¿Foi necesario utilizar los famosos “Hospitales de campaña”? ¿En dalgún momento quedó l’HUCA curtiu de UCI’s y/o alendaores?

L’hospital de campaña esi de los militares que ta nel parking 3 del HUCA, ta emplegándose como fastera de triax y pa la toma muestres de la CPR. Que por cierto, el personal ye’l d’urxencies del propiu HUCA, los militares tan ellí a mou de policíes regulando’l pasu y mandando au te tienes que parar y poner pa que t’atienda’l personal sanitariu. Eso polo menos yera asina cuando tuvi yo, yá te digo que los protocolos camuden caldía sigún necesidaes y lo que va diciendo la OMS.

La UCI tuvo mui enllena, pero nun llegó a quedar ensin cames. Anque faise triax tamién pa entrar nella; nun teo conocimientu d’una falta grave d’alendadores, ninguna compañera me cuntó nada al repective. Nun trabayo nesi serviciu y nun teo tolos datos.

 

-Dicen que n’Asturies la curva de contaxos va apandando, ¿nótase’n direutu la meyora de la situación?

 A nivel epidemiolóxico prefiero nun posicioname porque tendría abondos sesgos. Nesta selmana paez notase daqué meyoría, pero yo nun echaría les campanes al vuelu inda.

 

– A nivel sanitariu, ves factible un fin del empreslle por fasteres (supónse que n’Asturies vamos finar anantes que n’España) o ye valero si nun se presllen les comunicaciones?

La mio opinión personal sobre’l despieslle per fasteres ye que si, que tendría que facese gradual y por supuestu con control del trénsitu. Y d’esa mena apurri-y medios humanos y materiales solidariamente a quien lo necesite.

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies