La cuenta, baxo’l nome de “anti antifa asturias” y que pertenecía a un miembru del “Batallón Gijón” de los Ultra Boys, compartía semeyes d’asturianos antifacistes con mensaxes insultantes y menaciantes

“Pasarme fotos de guarretes por privado y yo las público”. Con esa ispiradora frase (falta d’ortografía incluyía) se presentaba la cuenta d’Instagram na que se señalaben como futures víctimes a persones reconocíes pola so brenga antifacista. Con 132 siguidores, “anti antifa asturias” espublizaba semeyes y datos personales d’estes persones, afalando al odiu contra elles.

“Nun tengo na contra a que se me reconoza comu Antifacista, de fechu teolo por arguyu y nun lo escuendo, nin na mio vida real nin nes redes sociales, pero ye una vulneración de la mio privacidá y una nidia menacia” declaraba un de los afeutaos pola cuenta. Nos caberos años nun son raros los ataques organizaos por parte de grupos d’estrema drecha española, llegando a suspendese un conciertu por menacies.

La cantidá de denuncies recibies nun solu díe “por incitación al odiu o a la violencia” obligaron al preslle de la cuenta d’esti personaxe, que se reconocía comu miembru del grupúsculu facista “Batallón Gijón”, recoyíu nel informe “Ultra Boys, violencia y Neonazismu en Xixón” comu un de los perfiles más radicales d’esta agrupación que s’escuda na imaxe de clú d’hinches fuboleros pa propagar dientro y fuera  l’estadiu mensaxes racistes, machistes, xenófobos, supremacistes y cargaos d’odiu.

Llucía F. Marqués

This work is licensed under a Creative Commons Attribution 4.0 International License.