“Nun podemos permitir que ante la nueva crisis se rescate a los de siempre. Depués de la cuarentena, tenemos que tar nes cais y desixir una salida popular a esta crisis”
L’Asociación xixonesa, que representa un de los barrios más obreros de la ciudá -La Calzada- llama al Pueblu Asturianu a amosase xuníu contra los abusos que vengan comu consecuencia del andanciu y espublicen una riestra cartelos nos que resumen perfecha y concisamente el problema y parte de les soluciones, denunciando la privatización de la sanidá y otros seutores estratéxicos, afalando’l consumu de productos propios y reclamando más inversión n’investigación.
Pa la Rede quedó demostrao que les élites son prescindibles dafechu y qu’ante esta situación son los obreros/es los/es que tan ehí: tresportistes, sanitaries, estibadores, investigadores, agricultores, curiaores, llimpiadores y los/es del comerciu d’alimentación, siguin calteniendo en pié la sociedá entantu, acusen, los ricos y poderosos tan namás que mirando pol su dineru.
Prevén que d’esta cris, comu pasó con otres, unos pocos llevarán el beneficiu ya’l restu asumiremos les perdes, pagando les consecuencies con más precariedá ya incertidume cuando ya Asturies s’alcontraba anantes del andanciu nel esmucerín por mor de la precariedá y la falta d’oportunidaes. Ellos cuéntenlo dende’l barriu La Calzada, “onde’l preciu d’alquiler mediu ye de 460 euros, preciu inasumible pa munches families castigaes pol paru y l’emplegu inestable; un barriu de xente trabayadora onde munches llegamos a dures penes a fin de mes, meta difícil d’algamar pa les que nun reciben nengun tipu de ingresu y mantiénense solo gracies a la solidaridá y al sofitu del resto. La situación de los/es más moces nun ameyora: más paru, incertidumbre y ensin salides profesionales nel nuestru entornu”.
Poro, ven necesario organizase pa que d’esta cris nun salgan perdiendo los de siempres y llamen a aprofitar la circustancia pa reforciar el sentimientu de comunidá y solidaridá.
Ye tiempu de nos.
Redaición InfoAsturies
This work is licensed under a Creative Commons Attribution 4.0 International License.
