Direutrices pa continuar col cursu escolar en confinamientu

  • 31 Marzo, 2020

Caltiénse’l calendariu escolar, la segunda evaluación puntuará lo fecho anantes del confinamientu y la tercera valorará’l trabayu on line de los escolinos ensin avanzar materia, un sistema que castiga a los rapacinos ensin acesu a medios dixitales, ya seya por cuestiones económiques o pola mala cobertura que se carez nes fasteres rurales

Agora mesmo la reciella y mocedá asturianes trabayen on line, enfrentándose a un sistema pal que nin escolinos nin profesores taben preparaos y qu’entamó a furrular d’un díe pa otru. El descontrol de los primeros díes va organizándose y la mayoría de los docentes ya tienen en marcha una planificación que permita a los estudiantes, sinon continuar deprendiendo, polo menos afitar conocimientos.

Sicasí, faltaron estes selmanes unes direutrices clares y mientres unos colexos apurren namás a les families unes indicaciones de trabayos voluntarios pa la reciella otros afueguen a les families nun escesu de trabayos y deberes qu’impliquen amás de tiempu y enfotu, l’usu de programes y teunoloxía non siempres al algame de toos.

Ayeri diéronse a conocer dalgunes guies pa esti prósimu trimestre: la evaluación del segundu trimestre ya ta en marcha, basándose no fecho anantes del 13 de Marzu y los cientros tienen una selmana pa presentar la so programación cola que desendolcar online el terceru. Pa la tercer evaluación tendránse’n cuenta les xeres y actividaes encamentaes de magar el 14 de Marzu, qu’en teoría nun deberíen suponer avances na materia, sinon “afondar n’aspeutos esenciales y competenciales”. El calendariu escolar caltiénse, con “vacaciones” del 6 al 12 d’abril.

No que cinca a la Preba d’Evaluación de Bachilleratu pal Acesu a la Universidá (EBAU), treslladáronse a les direiciones de los centros les propuestes de calendarios y contenios, que se planifiquen en coordinación cola Universidá d’Uviéu.

Amás, pondráse’n marcha un sistema de préstamu de los equipos informáticos de los cientros, apurriéndolos a los escolinos que nun tan siguiendo’l cursu por falta d’equipamientu teunolóxicu. P’aceder a esti préstamu remitiráse un cuestionariu a los cientros pa recoyer datos sobre les families que lo precisen, poniéndose a la so dimposición los ordenaores y tabletes de los colexos ya istitutos.

Aparte del equipamientu, ye imprescindible l’acesu a interné. Pa solucionar la evidente brecha dixital que dexa a miles d’escolinos ensin educación por falta de medios, l’estáu español prevé’l repartu de 20.000 llinies móviles pente tolos estudiantes ensin recursos de tol estáu. Namás n’Asturies hai alrodiu de 121.000 estudiantes, sumando los más de 60.000 escolinos de primaria, los 40.000 de secundaria y los cuasi 21.000 universitarios, de los que más de 25.000 pertenecen a esi 21% de les families asturianes en situación d’esclusión social. Poro, ye previsible que les 20.000 llinies ufries nun algamen pa toos. Arriendes d’ello, les fasteres rurales veránse tamién perxudicaes pola falta de cobertura que fadrá imposible la educación telemática.

Llucía F. Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies