• Portada
  • >
  • Economía
  • >
  • 5.400 dispidos, cayía del PIB y ERTES asgaya, les otres consecuencies del coronavirus

5.400 dispidos, cayía del PIB y ERTES asgaya, les otres consecuencies del coronavirus

  • 26 Marzu, 2020
El coste humanu y moral del Coronavirus ta a la vista. L’económicu y llaboral entama a acolumbrase y abulta llaceriosu
Por agora, son cerca de 7.000 solicitues d’ERTE, de les que 1.036 ya tan tramitaes, afeutando a 3.565 persones, pero siguen recibiéndose diariamente. La mayoría correspuenden a piqueñes empreses que presllen demientres la cris por causes de fuercia mayor: hostelería y hotelería, estética, piqueños comercios… pero tamién grandes empreses, comu Zara, IKEA, El Corte Inglés o Domino’s Pizza aprofitarán esta fórmula pa minimizar les sos perdes unviando al paro al so personal demientres dure’l confinamientu.
El Cientru de Predición Económica (Ceprede), prevé que la declaración del estáu d’alarma pa facer por aparar l’avance y espardimientu del virus implicará’l desaniciu de más de 5.400 puestos de trabayu n’Asturies, y que’l PIB va contrayese alrodiu d’un 1,36%.
Per otru llau, más de 70.000 autónomos asturianos van vese na situación de cargar colos gastos obligatorios ensin tener ingresos o teniéndolos baxo mínimos, lo que fae albidrar munches dificultaes pa continuar cola so actividá en pasando la cuarentena. Les midies contemplaes nel Real Decretu pa ellos impliquen que la única posibilidá d’aceder a una prestación de 700 euros pasa pel preslle o redución de los ingresos nun 75%, pero incluso dándose temporalmente de baxa n’autónomos tienen que siguir faciendo frente a gastos comu alquileres, seguros o suministros, imposibles de cubrir cola cantidá que se yos ufre.
Los seutores más afeutaos son los venceyaos al turismu, hostelería, axencies de viaxe, espectáculos y servicios esportivos, tresporte marítimu y aéreu… seique la demanda de productos industriales tamien carecieron un fuerte revés, con una contención del consumu del 80% frente al 49% de cayía nel comerciu al por menor. Los seutores agrarios y d’alimentación sedrán los que meyor se caltendrán, amosando la febleza d’una economía afitada nel seutor terciariu.
Nuria Prendes

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies