Col tráficu baxo mínimos pol aisllamientu, los datos de la contaminaición del aire n’Asturies siguen disparándose perriba lo aconseyao pola OMS

Perdayuri vemos datos del descensu de la polución gracies a la parada impuesta pola crís sanitaria. Sicasí, n’Asturies, onde les grandes industries continúen cola so actividá -poniendo de pasu en riesgu a los trabayaores y a les sos families- la contaminación lleva dos díes presentando índices de calidá especialmente malos.

Acordies a los datos oficiales qu’ufre’l gobiernu d’Asturies de contaminación atmosférica y calidá del aire na so web, Xixón lleva dos díes presentando índices ICA (Indiz de Calidá del Aire) permalos nes estaciones de l’Arena, el Llano y Montevil y malos nel restu. N’Uviéu, Ventanielles tien permala calidá ya’l restu mala.  En Llangréu rexístrense indices ICA permalos en Felguera y Sama, neto que’n Blimea (SMRA), Llugones (Sieru), Mieres, Salinas (Castrillón) y Cangas. Tou ello acordies a los datos de les estaciones públiques, que, sigún los ecoloxistes, ufren cifres menores de los reales por dispreciar les privaes, con piores datos, y buscando emplazamientos pocu contaminaos pa les estaciones de midición a costafecha.

Los picos de contaminación atmosférica disparen los ingresos hospitalarios n’Asturies por enfermedaes respiratories, acordies  a un estudiu epidemiolóxico fechu pola Conseyería de Sanidá y presentáu nel 2016, daqué especialmente esmoleceor teniendo en cuenta la escasez de medios hospitalarios a los que mos enfrentamos nesti intre.

Redaición InfoAsturies

This work is licensed under a Creative Commons Attribution 4.0 International License.