Les llimpiadores del HUCA nun son de riesgu, neto que les de los demás cientros hospitalarios del país. Nin elles, nin los celaores, alministrativos, personal de caltenimientu, etc

Les trabayaores denuncien que na rueda de prensa ufiertada a entamu de selmana pola xerente Saavedra “retorcieron la realidá hasta llendes insospechaes. Según  Saavedra hai de tou, nun hai falta de na, ta tou baxo control, tán cubiertes toles necesidaes a nivel asistencial, y si daqué ocurriere fuera de lo avezao, tomaríanse las midies afayaices”.

Sicasí, lo que cuenten les persones responsables de la llimpieza y desinfeción de los hospitales ye bien otro. Les sos llabores son imprescindibles pa frenar los contaxos dientro los mesmos hospitales (d’esta ya otres enfermedaes). Ya anantes d’esta crís sanitaria denunciaben la so sobrecarga de trabayu, reclamando la contratación de más presonal col que poder cumplir el desixente protocolu de llimpieza del SESPA.

N’honor a esta xente recoyemos el mensaxe que mos unvía una llimpiadora del HUCA, que paso a trescribir íntegru

“Toi indigná. Trabayo dende va años de llimpiaora del HUCA, siempres ensin problema. Güei (por ayeri) comuníquenmos dende prevención que nun somos personal de riesgu por coronavirus. ¿Quién entra a llimpiar el cuartu del paciente? ¿Quién llimpia techos, parees, cama perriba, perbaxo, y fasta faciendo’l pino del paciente? ¿Eso nun ye ser presonal de riesgu? Si nos contaxamos, mándenmos al mélicu de cabecera, nin ellos nin la mutua mos faen les prebes. ¿Puede tase más desprotexíu agora mesmo?”

Redaición InfoAsturies