• Portada
  • >
  • Asturies
  • >
  • Atender les presones más desprotexies y controlar los desplazaos, prioridaes p’Andecha Astur

Atender les presones más desprotexies y controlar los desplazaos, prioridaes p’Andecha Astur

  • 16 Marzo, 2020

 

Piden l’activación urxente de los servicios sociales pal curiáu de los más vulnerables al tiempu que denuncien la responsabilidá del gobiernu español y del “Principado” na espansión del coronavirus

La organización nacionaliega Andecha Astur vien d’emitir un comunicáu nel que llama a la población asturiana a curiase, a ser responsables y trabayar n’andecha pa salir de la cris sanitaria, ensin escaecer a les estayes más vulnerables de la población.

Metanes l’alarma ya en plena fas d’aisllamientu, ye perimportante nun perder de vista a les presones que viven soles o precisaes de curiaos a los que nun puen aceder por nun contar con redes rellacionales o de proteición y que nun son quien de cubrir por si mesmes les necesidaes más básiques, ya seya por cuestiones económiques, de salú o de salú mental. Poro, Andecha Astur considera imprescindible la deteición de situaciones de desproteición y la puesta en marcha por parte de los servicios sociales de les correspondientes aiciones paliatives. Esti llamáu contrasta cola anuncia por parte de la Cruz Bermeya de dellos conceyos de suspender la entrega d’alimentos prevista pa estos dies pa families y persones en riesgu d’esclusión.

Otra cuestión a la que ye necesario prestar especial atención ye al coleutivu de les  víctimes de violencia machista, ya que son asgaya los casos nos que se verán obligaes a vivir aisllaes col so agresor, polo que ye necesario caltenese sollerte p’actuar cola mayor eficacia posible nestes situaciones.

N’otru orde de coses, denuncien la responsabilidá del gobiernu español nel agravamientu de la situación sanitaria n’Asturies, al permitir el movimientu masivu y descontrolau de  procedentes de zones con altu potencial de contaxu  -madrilanos especialmente- favoreciendo l’espardimientu del virus y la so apaición en fasteres rurales onde la mayoría de la población pertenez a la estaya d’altu riesgu pola so edá y onde nun teníen porque producise contaxos, dau l’avezáu aisllamientu d’estos nucleos en temporada non turística.

Nesi sen, tachen d’inresponsable l’actuación del presidente del “Principado”, Adrián Barbón, “que n’almitiendo la necesidá d’aisllar Asturies pa contener el coronavirus, reconoz la so falta dafechu de competencies y non solo nun aislla a les poblaciones afeutaes pol ésodu de madrilanos, sinón que nin siquier toma precuros específicos con esa masa humano que se movió escontra les zones turístiques asturianes” achacando la situación al servilismu del gobiernu del “Principado”, xuníu a l’ausencia de competencies y de poder políticu.

El procesu recentralizaor de la Declaración d’Alerta aprobao pol gobiernu español, coles sos contradiciones, nun fae sinon recalcar esta situación de falta de soberanía y complicar la cris al aprebar  dimposiciones comunes a territorios que s’atopen en situaciones sanitaries estremaes dafechu, “como pue ser, ensin dir acullá, la de Madrid y la d’Asturies; nel primer de los casos con un porcentaxe de contaxu altu, y nel segundu siendo víctimes de la escorribanda ensin control d’aquella población”.

Nun escaecen agradecer l’actuación de los profesionales de la Sanidá Pública Asturiana, qu’en sufriendo demientres décades polítiques d’abandonu y precarización llaboral y de medios, tán supliendo col so enfotu y compromisu la falta de medios humanos y materiales na situación d’emerxencia que tamos viviendo.

Redaición InfoAsturies

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies