Los convocantes deciden suspender la protesta programá pa mañana xueves, fasta que pase la emerxencia sanitaria del Covid-19

La Plataforma contra la Contaminación de Xixón, la FAV y La Rede Oeste acaben de llanzar un comunicáu nel que informen de que la convocatoria queda temporalmente anulá “Por motivos de salú pública;  creemos que ye la nuesa responsabilidá nun fomentar un dañu potencial.”

Sicasí, son coscientes de que los problemes de polución que se carecen nos barrios del Oeste xixonés  -los más castigaos pola contaminación procedente de les grandes industries averaes- nun desapaecerán d’equí a pocu; de fechu, pa los vecinos d’estos barrios ye abegoso estremar los síntomes del covid-19: toses, afogamientu, dolores de tiesta y galvana son dalgunes de les consecuencies que tien la contaminación del aire nel díi ente díi de los ciudadanos. Poro, continúen cola so reclamación d’una  intervención pública darréu pa poner solución al problema, acusando a l’alministración asturiana y xixonesa d’inaición ante una cuestión que tamién perxudica fondamente a la salú pública.

Nesi sen, dende Andecha Astur denunciaron va pocu la conivencia del Conceyu Xixón pa con Arcelor ya’l “desdexamientu que fai l’Ayuntamientu de les sos responsabilidaes nel control medioambiental y defensa de la salú pública de los vecinos”.

Llucía F. Marqués

This work is licensed under a Creative Commons Attribution 4.0 International License.