• Portada
  • >
  • Opinión
  • >
  • Notarieis los nuesos llectores qu’ayeri InfoAsturies nun espublizó res. Esculpái, tábemos lluchando polos drechos de les muyeres

Notarieis los nuesos llectores qu’ayeri InfoAsturies nun espublizó res. Esculpái, tábemos lluchando polos drechos de les muyeres

  • 9 Marzo, 2020

Nin una mísera nota, nin siquier l’avezáu humor de Gonzalo Peláez, o’l tiempu. Ayeri los redautores d’InfoAsturies, muyeres y homes, teníemos otru trabayu, tábemos nes cais, nes manifestaciones, concentraciones, alcuentros o grupos de curiaos. Güei tampoco, les muyeres, van escribir: Asturies desvencéyase de Madrí y les asturianes, comu les aragoneses, les gallegues y les andaluces paren, seique somos coscientes de que la desinformación interesao menguará esti añu’l puxu la convocatoria

Tócame a mi, poro, un home, escribir la nota d’arguyu poles muyeres, protagonistes del qu’ensin dubia ye’l movimientu revindicativu con más puxu y futuru del momentu. Naide nun les va parar ya’l motivu ye evidente: lluchen pola so vida; por caltenela y porque seya digna, por ser llibres, por vivir segures. Por aportar a casa, soles si quieren y acompangaes si yos da la gana, serenes si cuadra o con una topinera del quince si yos sal del ratu, y quien nun lo pescancie que se lo faiga mirar.

Por elles tuvimos ayeri nes cais. Poles muyeres que ca díe esconsoñen y ponen en marcha’l mundiu. Poles que taben nes movilizaciones y poles que, preses de trabayos precarizaos -hostelería, curiaos, trabayos ensin contratos…- nun pudieron tar. Poles que fueron, les mas y güeles, qu’en tiempos de represión caltuvieron viva la llama de la xusticia; poles muyeres de families obreres que francieron techos, non de cristal, de cementu, sacando unes carreres fasta entos esclusives d’un sesu y d’una clase. Poles que vienen, les que s’estrenen nes cais y garren conciencia del puxu de la so voz con pancartes moraes. Poles que punxeron la so voz al serviciu la nuesa llingua, ya en tiempos en que la pallabra yera privilexu d’homes.

Polos que vendrán, la reciella que mira arguyoso a les sos mas, que s’educarán sabiendo que nun hai sitiu pal abusu ni pa la desigualdá nel futuru que vivirán. Poles muyeres rurales, principales trabayaores del campu, pero dueñes de menos del 30% de los títulos de propiedá. Poles muertes. Poles que compaxinen trabayos y curiaos en maratonianes xornaes de 24 hores. Poles muyeres trans, que toles muyeres son bien llegaes a esta llucha, y más les que, como nel so casu, tienen de bregar incluso pol drechu a ser. Poles muyeres d’América llatina, d’África, del mundiu árabe, les que medren sabiendo que la so vida nun cuenta, les que carecen con más violencia el pesu’l patriarcáu.

Poles violaes, abusaes, sesualmente esplotaes (respigóme ver en Xixón una filera muyeres de toles edaes col mensaxe “a mi tamién me lo ficieron”; llevaben la tiesta bien alto).  Poles qu’alzaron una bandera feminista tapando la d’España, nel mesmu focicu de Canteli. Poles que, xunto a la revindicación feminista lleven la llucha de clase y a la manifestación llevaron, tamién, la pancarta llaboral.

Poles que lluchen y poles qu’entá nun s’atreven a ello. Y polos homes, los que, cediéndoyos el protagonismu, tan na brenga, porque la llucha por una sociedá meyor ye cosa de toes y de toos.

Y por elles taremos tamién el restu’l mes, ya’l restu l’añu, dando la cara, porque si toquen a una retrucamos to@s, porque na Asturies que vien nun caben machismos nin violencies, porque’l pueblu asturianu, enteru, tien de ser llibre y onde hai miéu, nun hai llibertá.

Fino esti modestu homenaxe a les muyeres d’Asturies con un poema, más abaxo galería de semeyes.

Fía,
cuando bailles,
failo nel centru de la pista;
cuando mires,
mira siempre a los güeyos;
cuando fales,
que nun te temble la voz
porque, has sabelo,
vas ser la minoría
de la minoría,
los sordos van querer
facete muda; vas ser
doblemente anubrida,
por ser muyer y
por pensar nuna llingua
proscrita,
qué condena t’impunxo
la dignidá non negociada.

“Carta a una fía futura”
Pablo Texón Castañón “Allumamientu”

 

Vítor Corte

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies