• Portada
  • >
  • Asturies
  • >
  • Andecha Astur da por amortizáu’l tiempu de Barbón nel “Principado”

Andecha Astur da por amortizáu’l tiempu de Barbón nel “Principado”

  • 5 Marzu, 2020

La organización nacionaliega, que denuncia la continuidá de la corrución sistémica del “Principado” col actual gobiernu, llevó l’informe la Sindicatura Cuentes ente la Fiscalía Xeneral y ta entamando una ronda de contautos con muerganizaciones asturianes pa dar una rempuesta xunitaria 

Los informes del Tribunal de Cuentes, la sentencia’l Tribunal Supremu nel Casu Riopedre y l’informe la Sindicatura Cuentes, afiten la esistencia d’una corrución sistémica nel “Principado”,  siendo la primer vegá que les propies istituciones xudiciales y de fiscalización españoles vense obligaes, pa evitar responsabilidaes propies, a señalar les abondoses irregularidaes na xestión del “Principado”.

L’informe que presentó apocayá la Sindicatura de Cuentes d’Asturies, de fiscalización sol estáu de la Cuenta Xeneral d’Asturies de 2018 recueye prebes de que’l Gobiernu d’Adrián Barbón, les Conseyeríes del PSOE, los Muérganos y Entidaes d’elles dependientes cometen toa triba d’irregularidaes y fasta posibles delitos na so xestión: boicotéu del llabor de la Sindicatura, falta de contabilidá correcho, doble contabilidá con ingresos procedentes de fondos mineros, espedientes de créitu ensin valir llegal, ocultación de contratos menores, incumplimientu nel siguimientu los contratos, etc.

Per otru lláu, acordies el Tribunal de Cuentes, 1.786 millones d’euros tan desapaecios, ello ye, tuvieron un destín opacu ya irregular, sigún se desprende de les cuentes de xestión de los fondos mineros. El Tribunal señala la falta control nel repartu de les aídes a la minería’l carbón ente los años 2006 y 2017 y afita que munchos recursos presupuestarios desapaecieron ensin llegar a executase les midíes a les que diben empobinaos.

Otres de les irregularidaes señalaes esplícitamente nesi informe ye la falta d’execución del 47% de les aídes ente 1998-2005, nengún plan mineru firmáu ente 2013-2018, descontrol, discrecionalidá, irregularidaes, incumplimientu requisitos, falta siguimientu, incumplimientu condiciones…

Poro, dende Andecha interpreten esti informe comu “una acusación clara d’inhibición dolosa, ocultación o complicidá, según los casos, de munchos de los miembros de la Comisión de Investigación sobro fondos mineros que foncionó en 2015 na Xunta Xeneral d’Asturies. Aquella comisión aconceyóse durante cuatru meses, atendió 67 comparecencies y, a lo cabero, refugó la propuesta de dictame qu’ellaborare’l so presidente, disolviéndose ensin conclusión dala”.

Antecedentes d’esta corrución atópense na sentencia del Tribunal Supremu nel casu Riopedre-PSOE, que señala comu corrompíu’l gobiernu asturianu nel tiempu en que foi presidíu por Álvarez Areces.

Ante esta situación, qu’Andecha Astur considera gravísima, tan entamando contautos con toa triba d’organizaciones asturianes pa encadarmar una rempuesta xunitaria contra l’actual gobiernu y que priorice los esfuercios llesxisllativos en materia de seutores productivos, emplegu, redistribución de la riqueza y cris demográfico, na promoción d’auditoríes de finances y deldes públiques, na llucha escontra la corrución y el control de la xestión público y la tresparencia, na oficialidá de la llingua asturiana y a les polítiques d’escolarización y normalización social de la mesma y la superación del marcu políticu que carecemos anguañu: una institución, el “Principado”, y un Estatutu d’Autonomía impuestu.

Nuria Prendes


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies