La cuarta xornada de tastia d’esti clú cuenta con delles novedaes, cómu la preba final a ciegues nel que tendrán qu’identificar una sidre asturiana pol so tastu o la presentación d’una sidre esperimental. L’eventu ye abiertu a tolos públicos y tien un coste de 10 € pa los non socios

El Clú de LA SIDRA aconceya’l primer xueves de ca mes a un bon garrapiellu d’apasionaos sidreros y sidreres enfotaos en conocer más y meyor la sidra. Pa ello, entamen nel llocal de la Revista LA SIDRA tasties nes que, baxo la guía d’espertos na materia, van analizando les propiedaes organoléptiques d’estremaes sidres.

El xueves 5 de marzu proponen prebar sidres estremaes, dos d’Asturies, una polaca y una alemana; l’espertu Manuel G. Busto sedrá l’encargáu de guiar a los participantes pa que seyan quien a estremar toles peculiaridaes de ca una d’elles.

Dende Villaviciosa traerán pa tastiar Sidre Cortina aneyo, del llagar del mesmu nome. Dende Polonia vien la sidre Dobronski zimowy, del Llagar Janton, y dende alemania la sidre Bembel-whith-care, “Pura”, seco y con cafeína. Comu novedá, ufriráse en primicia a los presentes una sidre esperimental de xelu, semi-seco, fecho n’Asturies, d’edición llimitao y qu’entá nun salió a la venta.

Arriendes d’ello tastiaráse una sidre nuevo tovía por faer, pa deprender a estremar el progresu de la sidre a lo llargo la so formientación y habrá concursu final nel que s’intentará identificar -en tastia a ciegues- una sidre asturiana.

La tastia tendrá llugar nos llocales de la revista LA SIDRA (Prendes Pando 11 baxo drecha. Xixón), de magar les 20 hores del xueves 5 de marzu Y tendrá un preciu de 10 €  pal públicu’n xeneral y de 5 € pa los miembros del Clú de LA SIDRA.

Redaición InfoAsturies

This work is licensed under a Creative Commons Attribution 4.0 International License.