Denuncien que, a pesar de la so evidente peligrosidá, la planta de tratamientu de mineral de Orovalle en Balmonte sigue utilizando -y virtiendo- compuestos cianuraos y otros elementos altamente tósicos y acumulativos como l’arsénicu, cadmiu, cromu, cobre, manganesu, mercuriu, níquel, plombu y cinc

Por cuenta de la información pública de la Revisión de l’Autorización Ambiental Integrada de la planta, que s’atopa na localidá de Boinás, afalaron l’usu de productos menos tóxicos pa la estracción del oru, solicitando que s’incluya na revisión como condición desixida pa la renovación.

La importante buelga tóxica del cianuru, asina comu l’altu riesgu de que se produzan acidentes de gravedá, faen insuficientes les midíes propuestes pola empresa, relatives al tratamientu de les agües destinaes al so arramáu.

Balmonte ya tuvo repitíes sanciones por arramaos non autorizaos al ríu Cauxa, afluente del Narcea,n’abondes ocasiones. Polo que, considerando l’historial infractor de la esplotación, los ecoloxistes piden que se condicione la revisión a la istalación d’una estación d’analís y rexistru de tolos parámetros físicu-químicos oportunos analizables in situ, precintáu pa evitar la so manipulación, en ca tubería usada pa realizar los arramaos.

Tamién amosaron la so esmolición pola estabilidá ya impermeabilización de les varies balses de llodos cianuraos qu’hai na zona, yá que, anque’l cianuru llibre descomponse cuando ta espuestu a la lluz del sol, el so emplegu pa la estracción d’oru forma compuestos cianuraos tósicos como cianatos, tiocianatos y complexos cianometálicos que persisten décades (con estimaciones de tiempu de tosicidá media de 75 años), dando llugar a tonelaes de folles contaminaes con una vida bien llarga de tosicidá, daqué que contradiz al informe de revisión, onde se recueye unicamente la esistencia de “llodos descontaminados”.

Finalmente, recuerden que “el peligru nun son solo los compuestos cianurados, sinón igualmente les ellevaes cantidaes d’arsénicu, cadmiu, cromu, cobre, manganesu, mercuriu, níquel, plombu y cinc que s’arramen, toos ellos altamente tósicos y acumulativos”.

Redaición InfoAsturies

This work is licensed under a Creative Commons Attribution 4.0 International License.